لاہور ( آن لائن )قومی ہاکی ٹیم کے کپتان محمد عرفان نے کہا ہے کہ اذلان شاہ ہاکی ٹورنامنٹ میں ٹیم کی شکست کی وجوہات میں سینئر کھلاڑیوں کا ٹیم میں شامل نہ ہونا ، ٹریننگ کے لئے کم وقت ملنا ،فٹنس مسائل شامل تھے۔ ایک انٹرویو میں محمد عرفان نے کہاکہ ورلڈکپ کوالیفائنگ راؤنڈ کی تیاریوں کے لئے اذلان شاہ ہاکی ٹورنامنٹ میں سینئر کھلاڑیوں کو ریسٹ کروا کر جونیئر کھلاڑیوں کو موقع دیا گیا تھا تاکہ انہیں انٹرنیشنل میچز کا تجربہ ہو، ٹیم کو پنلٹی کارنر، ڈیفنس اور فنٹس کے شعبہ میں بہتری کی ضرورت ہے۔ ہمارے تمام کھلاڑی انفرادی صلاحیتوں کے اعتبار سے یورپین ٹیموں سے بہتر ہیں لیکن انہیں زیادہ سے زیادہ میچز کھلائے جائیں تو ان کے مابین انڈر اسٹینڈنگ پیدا ہوجائے گی۔ بھارت نے اپنی ٹیم کے لئے ہاکی لیگ کے علاوہ بہترین سپورٹنگ سٹاف کی خدمات حاصل کی ہوئی ہیں اور ان کی ٹیم کو انٹرنیشنل میچز بھی بہت زیادہ کھیلنے کو ملتے ہیں جس کی وجہ سے ان کی ٹیم میں کافی بہتری آئی ہے۔پاکستان کی ٹیم نے اگر ایشیا میں بہتر ٹیم بننا ہے تو اسے زیادہ سے زیادہ یورپین ٹیموں کے ساتھ میچز کھیلنے پڑیں گے۔ محمد عرفان نے ایک سوال کے جواب میں بتایا کہ ایف آئی ایچ کی طرف سے چیمئنز ٹرافی ہاکی ٹورنامنٹ کو ختم کرنے کا فیصلہ صحیح نہیں ہے اور اسے اس فیصلہ پر نظر ثانی کرنی چاہئے۔ انہو ں نے بتایا کہ وہ اور قومی ہاکی ٹیم کے دیگر کھلاڑی اگلے ہفتے بنگلہ دیش ہاکی لیگ کھیلنے کے لئے بنگلہ دیش جارہے ہیں۔
فرمان الہی
نماز کے اوقات
