زرداری، نواز شریف، فضل الرحمٰن رابطہ، وزیراعظم سے فوری استعفے کا مطالبہ

اسلام آباد (نمائندہ جنگ،نیوز ایجنسیاں) سابق صدر آصف علی زر داری ، سابق وزیر اعظم نوازشریف اور جے یو آئی (ف) کے سربراہ مولانا فضل الرحمٰن نے وزیر اعظم سے فوری استعفیٰ اور نئے الیکشن کا مطالبہ کیا ہے ۔

آصف زرداری نے کہا کہ حکومتی ارکان ہم سے رابطے میں ہیں، جمعرات کو سابق صدر آصف علی زرداری نے نواز شریف اور مولانا فضل الرحمان سے رابطہ کیا ہے، تینوں رہنماؤں نے وزیراعظم سے فوری استعفے اور نئے الیکشن کا مطالبہ کر دیا ہے۔

سابق صدر آصف علی زرداری نے یوسف رضا گیلانی کی کامیابی یقینی بنانے پر نواز شریف اور مولانا فضل الرحمان کو فون کر کے ان کا شکریہ ادا کیا۔اس موقع پر فضل الرحمان نے کہاکہ یوسف رضا گیلانی ہمارے مشترکہ اور متفقہ امیدوار تھے ان کی کامیابی پی ڈی ایم کی کامیابی ہے۔

اسی اتحاد سے عمران خان کو جلد اقتدار سے رخصت کرینگے۔آصف زرداری، نواز شریف اور فضل الرحمان نے پی ڈی ایم کی مستقبل کی حکمت عملی اور لانگ مارچ کی تیاریوں پر بات چیت کی۔