فرمان الہی
نماز کے اوقات
لاہور( نمائندہ جنگ)نیب لاہور نے مریم نواز کی آج پیشی کو کورونا وائرس کے پھیلاؤ کے خطرے اور مفاد عامہ کے پیش نظر ملتوی کردیا ہے، نئی تاریخ کا اعلان مناسب وقت پر کیا جائے گا۔نیب کے اعلامیے میں کہا گیا ہے کہ پیشی کورونا کے پھیلائوکے باعث ملتوی کی گئی ہے۔
قومی احتساب بیورو میں گزشتہ روز ایک اعلیٰ سطح کااجلاس منعقد ہوا جس میں مریم نواز کی آج ہونے والی پیشی اور نیشنل کمانڈ اینڈ آپریشن سینٹر کی جانب سے ملک میں کورونا وباءکی تیسری اور شدید لہر کے حوالے سے جاری ہدایات کا بغور جائزہ لیاگیا۔
اجلاس میں بتایاگیا کہ این سی او سی کی جانب سے ہجوم اکٹھا کرنے پر مکمل پابندی عائد کی گئی ہے۔ بریفنگ میں بتایاگیا کہ مریم نواز کو اس سے قبل بھی پیشی کے لئے طلب کیاگیا تھا اور اس موقع پر نیب لاہور کی عمارت پر دانستہ شدید پتھراؤ کا مظاہرہ کیاگیا جو نیب کی تفتیش میں رکاوٹ ڈالنے کے مترادف ہے جبکہ ملزمان کے خلاف اس غیر قانونی برتاؤ کی ایف آئی آر بھی متعلقہ تھانہ میں درج ہے۔
نیب قانون کی شق 31(a)کی رو سے نیب کی تحقیقات میں عدم تعاون کا مظاہرے کرنے، رخنہ ڈالنے یا گمراہ کرنے کی صورت میں دس سال تک قید کی سزا سنائی جاسکتی ہے، ان قانونی اختیارات کے باوجود نیب کی جانب سے تاحال انتہائی صبرو تحمل کا مظاہرہ کیاگیا ہے۔
نیب ترجمان کے مطابق مریم نواز کو دوسری مرتبہ آج 26مارچ کو نیب تفتیشی ٹیموں کے روبرو پیش ہونے کے لئے نوٹسز ارسال کیے تاہم این سی او سی کی ہدایات کو مدنظر رکھتے ہوئے اور مفاد عامہ کے پیش نظر کی جانب سے یہ اصولی فیصلہ کیاگیا ہے کہ ملزمہ مریم نواز کی نیب لاہور میں آج کی پیشی ملتوی کردی گئی ہے۔
نئی تاریخ کا اعلان بعد ازاں مناسب وقت پرکیا جائے گا، اس موقع پر نیب اجلاس نے انتظامیہ کو فی الفور تمام سکیورٹی اقدامات واپس ختم کرنے کی ہدایات جاری کرنے کا فیصلہ بھی کیاہے۔
نیب کی جانب سے ایک مرتبہ پھر واضح کیاگیا ہے کہ نیب ایسے تمام اقدامات کی سختی سے نفی کرتا ہے جن میں مبینہ طور پر قومی ادارہ کو کسی دباؤ میں لانے کے لئے مختلف حربوں کا استعمال کیا جائے۔
نیب انسداد بدعنوانی کا معتبر قومی ادارہ ہے جس کا کسی بھی سیاسی گروہ یا جماعت سے کسی قسم کا تعلق نہیں بلکہ نیب کی وابستگی صرف اور صرف ریاست پاکستان اور پاکستان کی عوام سے ہے۔
