• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سیاحوں کی حفاظت کیلئے کیوائی، کاغان میں ویکسی نیشن سینٹرز قائم

مانسہرہ میں سیاحت کے کاروبار اور سیاحوں کی حفاظت کے لئےکیوائی اور کاغان میں کورونا ویکسی نیشن سینٹرز قائم کردیے گئے ہیں جبکہ منگل تک ناران میں بھی کورونا ویکسی نیشن سینٹر کام شروع کر دے گا۔

مانسہرہ کے عوام کے لئے ماس ویکسی نیشن سینٹر نیو سرکٹ ہاؤس میں قائم کیا گیا ہے جس کا افتتاح ایم پی اے بابر سلیم خان نے کیا۔

ضلع میں قائم 12مراکز میں 4 ہزار اساتذہ سمیت 44 ہزار افراد کو ویکسین لگائی جاچکی ہے۔

ڈپٹی کمشنر مانسہرہ ڈاکٹر قاسم نے بتایا کہ آج سے ویکسین لگائے بغیر کوئی استاد تدریسی عمل میں حصہ نہیں لے سکے گا جبکہ سیاحوں کے لئے تیسرا ویکسی نیشن سینٹر ناران میں جلد کام شروع کردیگا۔

ڈاکٹر قاسم علی نے بتایا کہ کیوائی میں اسوقت و یکسی نیشن سینٹر کام کر رہا ہے اور ایک ویکسی نیشن سینٹر کاغان میں کام کررہا ہے۔

انہوں نے بتایا کہ ویکسی نیشن سینٹر پیر اور منگل کو ناران میں بھی کام کرے گا جبکہ عوام نے ویکسینیشن سینٹرز کے قیام پر اطمینان کا اظہار کیا ہے۔

مقامی شہری کاکہنا ہے کہ ہم اس کا خیر مقدم کرتے ہیں چونکہ جگہ جگہ ویکسی نیشن سینٹر کھلنے سے عوام کو بہت فائدہ ہو رہا ہے۔

ایم پی اے بابر سلیم خان کا کہنا تھا کہ کورونا وائرس کیخلاف جنگ میں حکومتی اداروں اور عوام کے درمیان ہم آہنگی سے ہی کامیابی ممکن ہو سکتی ہے۔

قومی خبریں سے مزید