فرمان الہی
نماز کے اوقات
اسلام آباد (اے پی پی)وزیر خارجہ مخدوم شاہ محمود قریشی نے کہا ہے کہ ایف اے ٹی ایف کے حوالے سے پاکستان تکنیکی لوازمات پورے کر چکا ہے، مزید گرے لسٹ میں رکھنا مناسب نہیں رہتا،اگر پاکستان پر محض تلوار لٹکائے رکھنا مقصود ہے تو اور بات ہے، دیکھتے ہیں کہ پلیمری اجلاس میں کیا فیصلہ ہوتا ہے، بھارت اس فورم کو سیاسی مقاصد کیلئے استعما ل کرنا چاہتا ہے ۔بدھ کو ایف اے ٹی ایف کے حوالے سے اپنے ایک بیان میں وزیر خارجہ نے کہا کہ ایف اے ٹی ایف ایک ٹیکنیکل فورم ہے، ایف اے ٹی ایف کے حوالے سے پاکستان تکنیکی لوازمات پورے کر چکا ہے۔ شاہ محمود قریشی نے کہا کہ ہمیں 27 ایکشن آئٹمز دیے گئے جس میں سے 26 پر کام مکمل کر چکے ہیں جبکہ ستائیسویں نکتے پر بھی بھرپور کام ہو چکا ہے، اس صورتحال میں پاکستان کو گرے لسٹ میں رکھنے کا کوئی جواز باقی نہیں رہتا۔ شاہ محمود قریشی نے کہا کہ پاکستان کو مزید گرے لسٹ میں رکھنا نامناسب ہو گا، پاکستان نے عالمی رائے اور قومی مفاد کو پیش نظر رکھتے ہوئے اہم فیصلے کیے اور دیگر ممالک کو اعتماد میں لیا جبکہ وزیر اعظم عمران خان نے اپنی سطح پر مختلف ممالک کی قیادت سے رابطے کیے ،جو قانون سازی درکار تھی وہ ہم نے کی۔ وزیر خارجہ نے کہا کہ پاکستان نے منی لانڈرنگ اور دہشت گردی کی مالی معاونت روکنے کیلئے ٹھوس اقدامات کیے۔ مخدوم شاہ محمود قریشی نے کہا کہ گرے لسٹ کا تحفہ ہمیں ورثے میں ملا،ہماری حکومت آنے سے پہلے پاکستان گرے لسٹ میں جا چکا تھا، تاہم ہم نے پاکستان کو گرے لسٹ سے نکالنے کیلئے ہر ممکن کوشش کی ۔ شاہ محمود قریشی نے کہا کہ آج دنیا اعتراف کر رہی ہے کہ ایسے ٹھوس اقدامات، پاکستان میں پہلے کسی حکومت نے نہیں اٹھائے۔ وزیر خارجہ نے کہا کہ میری نظر میں پاکستان ایکشن پلان پر مکمل عملدرآمد کر چکا ہے،وزارتِ خارجہ اپنا واضح موقف پیش کر چکی ہے اور بہت سے ممالک پاکستان کے موقف کو تسلیم بھی کر چکے ہیں۔ وزیر خارجہ نے کہا کہ چاہتے ہیں پاکستان گرے لسٹ سے نکل کر وائٹ لسٹ میں آ جائے۔
