فرمان الہی
نماز کے اوقات
مسلم لیگ نون کے رہنما اور سابق وفاقی وزیر احسن اقبال کا کہنا ہے کہ اپوزیشن ہی ہمیشہ دنیا میں پارلیمنٹ میں احتجاج کرتی ہے، موجودہ حکومت پہلی ہے جو خود ایوان میں احتجاج کرتی ہے۔
جیو نیوز کے مارننگ شو جیو پاکستان میں گفتگو کرتے ہوئے مسلم لیگ نون کے رہنما اور سابق وفاقی وزیر احسن اقبال نے کہا کہ حکومت کے رویے سے ایوان کا ماحول خراب ہو جاتا ہے۔
انہوں نے کہا کہ حکومتی وزراء ایوان کو اپنی کارکردگی بتانے کے بجائے اپوزیشن پر کیچڑ اچھالتے ہیں، حکومت اگر ایوان کی پاسداری کرے تو کوئی وجہ نہیں کہ ایوان کا ماحول خراب ہو۔
احسن اقبال کا کہنا ہے کہ اب بھی حکومت نے انتخابی اصلاحات سے متعلق مشاورت کے بجائے یک طرفہ آرڈیننس جاری کیا، حکومت نے ایوان کو بلڈوز کرتے ہوئے ایسے قوانین پاس کرائے جو آئین کے خلاف تھے۔
انہوں نے کہا کہ اسپیکر نے قوانین کا جائزہ لینے کیلئے کمیٹی بنائی، اگلے ہی دن حکومت کے مشیر بابر اعوان نے کہہ دیا کہ کسی چیز پر نظرِ ثانی نہیں ہو سکتی۔
نون لیگی رہنما نے کہا کہ حکومت ایک دن کچھ کہتی ہے، اگلے دن اس سے مکر جاتی ہے، ہماری تجویز ہے کہ الیکشن کمیشن آزاد منصفانہ الیکشن کرائے۔
ان کا کہنا ہے کہ الیکشن کمیشن تمام جماعتوں کو دعوت دے اور ڈائیلاگ کے بعد قومی اتفاقِ رائے کیا جائے، پچھلے ضمنی انتخابات میں حکومت مسلسل ہاری ہے۔
احسن اقبال کا مزید کہنا ہے کہ 2018ء میں پاکستان تحریکِ انصاف (پی ٹی آئی) جہاں سے الیکشن جیتی وہاں سے بھی اب ہار چکی ہے۔
انہوں نے یہ بھی کہا کہ 70 سال میں گرمیوں میں کبھی گیس کی لوڈ شیڈنگ کی مثال نہیں ملتی، موجودہ حکومت جتنی نا اہل ثابت ہوئی اس سطح کی نا اہلی کبھی دیکھی نہیں گئی۔
