• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

نور مقدم قتل: مرکزی ملزم ظاہر جعفر کا مزید دو روزہ جسمانی ریمانڈ منظور

اسلام آباد(آئی این پی ) عدالت نے نور مقدم قتل کیس کے مرکزی ملزم ظاہر جعفر کا مزید دو روزہ جسمانی ریمانڈ منظور کرلیا،عدالت نے پولیس کو ملزم سے تفتیش کرکے 28جولائی کو دوبارہ پیش کرنے کا حکم دے دیا،سرکاری وکیل کے مطابق ملزم سے پستول ریکور کرلیا، اب موبائل ریکور کرنا ہے،۔ تفصیلات کے مطابق تھانہ کوہسار پولیس نے نور مقدم قتل کیس کے مرکزی ملزم ظاہر جعفر کو دو روزہ جسمانی ریمانڈ مکمل ہونے پر اسلام آباد کچہری میں ڈیوٹی مجسٹریٹ صہیب بلال رانجھا کے سامنے پیش کیا، ملزم کو سخت سیکورٹی میں عدالت لایا گیا۔ سرکاری وکیل ساجد چیمہ کا کہنا تھا کہ ملزم ظاہر جعفر سے پسٹل ریکور کرلیا گیا ہے، اب اس سے موبائل ریکور کرنا ہے۔ لہذا عدالت ملزم کا مزید جسمانی ریمانڈ منظور کرے۔ ملزم نے عدالت کے سامنے انگریزی زبان میں کہا کہ میں سن نہیں سکتا۔ جس پر عدالت نے ملزم کو روسٹرم پر لانے کی ہدایت کی۔ ملزم کے وکیل نے عدالت کے سامنے موقف پیش کیا کہ پولیس نے ملزم سے جو ریکوری کرنی تھی کر چکے، اب مزید جسمانی ریمانڈ نہ دیا جائے، کوئی قانونی پوائنٹ بھی نہیں کہ ملزم کا مزید جسمانی ریمانڈ دیا جائے۔ مقتولہ کے والد شوکت مقدم کے وکیل شاہ خاور نے بھی عدالت کے سامنے ملزم کے مزید جسمانی ریمانڈ کی حمایت کرتے ہوئے موقف پیش کیا کہ کیس میں مزید دفعات لگی ہیں، شریک ملزمان بھی گرفتار ہوئے، عدالت ملزم کا مزید جسمانی ریمانڈ منظور کرے۔ عدالت نے پولیس کی استدعا پر ملزم ظاہر جعفر کا دو روزہ جسمانی ریمانڈ منظور کر لیا، عدالت نے پولیس کو ملزم سے تفتیش کرکے 28 جولائی کو دوبارہ پیش کرنے کا حکم دیتے ہوئے کیس کی سماعت ملتوی کردی۔

اہم خبریں سے مزید