• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سری لنکا، 10کروڑ ڈالر مالیت کا 510 کلو گرام کا بیش قیمتی نیلم دریافت

کولمبو(جنگ نیوز)دنیا میں اب تک کا سب سے بڑا نیلم سری لنکا میں دریافت کیا گیا ہے اور اس کے وزن کے ساتھ ساتھ قیمت کے بارے میں جان کر ہر شخص حیران ہے۔ تفصیلات کے مطابق سری لنکا میں ایک کاروباری شخص کے گھر سے کنوئیں کی کھدائی کے دوران کم و بیش 510 کلو گرام کا بیش قیمتی نیلم دریافت کیا گیا ہے۔ اسے دنیا کا سب سے بڑا نیلم بتایا جا رہا ہے اور ماہرین کا یہ بھی کہنا ہے کہ بین الاقوامی بازار میں اس نیلم کی قیمت تقریباً 7.5 ارب روپے (10 کروڑ ڈالر) ہوگی۔اس تعلق سے سری لنکا کے افسران کا کہنا ہے کہ واقعہ سری لنکا واقع رتن پورہ علاقے کا ہے جہاں بیش قیمتی زیورات کے ایک تاجر ڈاکٹر گماگے کے گھر کے پیچھے کنوئیں کی کھدائی کی جارہی تھی۔ اسی دوران اچانک ایک بڑا سا نیلم دکھائی دیا۔ 25 لاکھ کیریٹ کے اس نیلم کا وزن تقریباً 510 کلو گرام ہے۔ ڈاکٹر گماگے کے مطابق ان کے گھر میں کنوئیں کی کھدائی کے دوران مزدوروں کو یہ نیلم ملا جس کی اطلاع انھوں نے فوری طور پر دی۔ بعد میں ڈاکٹر گماگے نے اسے کنوئیں سے باہر نکلوایا۔ماہرین نے اس نیلم کو ’سرینڈیپٹی سفائر‘ کا نام دیا ہے۔ اس کا مطلب ہوتا ہے ’قسمت سے ملا نیلم‘۔ مشہور ماہر جواہرات ڈاکٹر جیمنی جوئسا کا کہنا ہے کہ میں نے اتنا بڑا نیلم اس سے پہلے کبھی بھی نہیں دیکھا۔ یہ شاید 40 کروڑ سال پہلے بنا ہوگا۔ ماہرین کا یہ بھی کہنا ہے کہ سری لنکا کی صنعت جواہرات کے لیے یہ نیلم ’آبِ حیات‘ کا کام کر سکتا ہے۔قابل ذکر ہے کہ کورونا وائرس وبا اور لاک ڈاؤن کے سبب گزشتہ سال سے اب تک یہاں کی صنعت جواہرات کو کافی نقصان برداشت کرنا پڑا ہے۔ اس صنعت سے وابستہ افراد نے امید ظاہر کی ہے کہ یہاں دریافت کردہ نیلم ایک بار پھر بین الاقوامی خریداروں کو سری لنکاکی صنعت جواہرات کی طرف متوجہ کرنے کا کام کرے گا۔ نیشنل جیم اینڈ جویلری اتھارٹی آف سری لنکا کے چیف تلک ویرسنگھے کا کہنا ہے کہ ’’ یہ نیلم بے حد خاص ہے۔ شاید یہ دنیا کا سب سے بڑا نیلم ہے اور اس کی قیمت و سائز دیکھ کر ہمیں لگتا ہے کہ یہ بین الاقوامی ماہرین اور میوزیم کی توجہ واپس سری لنکا کی جانب کھینچے گا۔‘‘

اہم خبریں سے مزید