فرمان الہی
نماز کے اوقات
لاہور(نمائندہ جنگ، این این آئی) پاکستان مسلم لیگ (ن) کے صدر و قائد حزب اختلاف محمد شہباز شریف نے کہا کہ آئی ایم ایف کی شرائط پوری کرنے کے لئے بجلی، گیس، اشیائے خوردونوش مزید مہنگی کرنے کا ظلم نہ کیا جائے، جولائی میں ہی تجارتی خسارہ81.4فیصد تک بڑھ گیا، عوام اور عالمی مالیاتی اداروں سے جمع ہونے والا یہ سب پیسہ آخر جاکہاں رہا ہے؟ خرچ کہاں ہورہا ہے؟، آٹا چینی، دال گھی، دوائی بجلی سب کچھ مہنگاترین ہوگیا لیکن پھر بھی حکومت کا رونا دھونا جاری ہے، کرنٹ اکاونٹ سرپلس کے حکومتی دعوے دم توڑ گئے ،حکومت کو متنبہ کرتا ہوں کہ عوام پر مہنگائی کا مزید بوجھ لادنے کے بجائے کم کرے ۔ ایک بیان میں انہوں نے کہاکہ تعجب اس بات پر ہے کہ حکومت قرض پر قرض لیتی جارہی ہے اور مہنگائی بھی بڑھاتی جارہی ہے، کورونا بھی جاری ہے اور حکومت کا رونا دھونا بھی جاری ہے ، ملک میں آئندہ ایک سے 3ماہ میں مہنگائی کا نیا طوفان آنے والا ہے، کرنٹ اکاونٹ سرپلس کے حکومتی دعوے دم توڑ گئے ،درآمدات دوگنا بڑھ چکی ہیں، ڈالر کی قیمت اوپر اور روپے کی قدر مسلسل نیچے جا رہی ہے ، جولائی کے مہینے میں امپورٹ بل 47فیصد بڑھنا معاشی تباہی کے اشارے ہیں ،گزشتہ مالی سال کے 3.7 ارب ڈالر کے مقابلے میں گزشتہ ماہ 5.4 ارب ڈالر امپورٹس ہوئیں ، عوام پر ہر ماہ ، ہر ہفتے مہنگائی کی قیامت ڈھانے والے مزید اور کتنا ظلم کرنا چاہتے ہیں، ظلم کے اس نظام کیخلاف عوام کا لاوہ پک رہا ہے، پھٹا تو کوئی نہیں بچے گا۔
