فرمان الہی
نماز کے اوقات
کووِڈ-19وَبائی مرض نے عالمی نفسیات پر انتہائی مضر اثرات مرتب کیے ہیں۔ اندازہ ہے کہ وَبائی مرض نے تقریباً ایک ارب افراد کی ذہنی صحت کو متاثر کیا ہے۔ وَبا کے بعد جب عالمی معیشت دوبارہ معمول کی طرف جانے کی کوشش کرے گی اور دفاتر کھُلنا شروع ہوں گے، اس سے قبل، یہ ضروری ہے کہ کمپنیاں ان تمام عوامل کی نشاندہی کرلیں جو ملازمین کی ذہنی صحت پر اثرات مرتب کرسکتے ہیں اور ساتھ ہی اس بات کا بھی انتظام کریں کہ ان کی کس طرح معاونت کی جائے۔ اگر موجودہ دفتری حالات کی بات کریں تو ملازمین کی ایک بڑی تعداد گھروں سے کام کررہی ہے۔ تحقیق یہ بتاتی ہے کہ مسلسل گھر سے کام کرنا ملازمین کی ذہنی صحت پر زیادہ دباؤ کا باعث بنتا ہے۔
ذہنی صحت اور کارکردگی
عالمی ادارہ صحت کے مطابق، ذہنی تندرستی کی تعریف فلاح و بہبود کی حالت کی حیثیت سے کی گئی ہے جس میں کوئی بھی فرد اپنی صلاحیتوں کا ادراک کرسکتا ہے ، زندگی کے معمول کے دباؤ سے نمٹ سکتا ہے اور نتیجہ خیز کام کرسکتا ہے۔ دماغی صحت کسی کی جذباتی ، نفسیاتی اور معاشرتی بھلائی کو بیان کرتی ہے۔ وَباکے دور میں خاص طور پر ملازمین کو ہر ایک دن ذہنی صحت کے چیلنجز کا سامنا کرنا پڑتا ہے۔
کسی شخص کی ذہنی صحت اتنی ہی اہم ہے جتنی اس کی جسمانی صحت، اور جسمانی بیماریوں کی طرح ذہنی صحت کی صورتِ حال بھی اتنی ہی حقیقی ہے۔ اپنی گفتگو اور دوسروں کے ساتھ بات چیت کے دوران اس بات کو ذہن میں رکھنا ضروری ہے۔ ذہنی صحت، جذباتی، معاشرتی اور نفسیاتی تندرستی سے مل کر بنتی ہے۔ مثبت ذہنی صحت کا حصول بہت سے طریقوں سے قابل قدر اور مددگار ہے۔ ملازمین گھر سے کام کرتے ہوئے درج ذیل باتوں کا خیال رکھ کر اپنی ذہنی صحت کا بہتر طور پر خیال رکھ سکتے ہیں۔
شیڈول بنائیں
وَبا اور اس کے نتیجے میں لگنے والے لاک ڈاؤن اور دیگر عوامل کے باعث ہم سب ایک نئی بلکہ عجیب و غریب طرزِ زندگی کی طرف جا رہے ہیں۔ یہ چیز ہماری ذہنی تندرستی کے لیے خطرہ ہوسکتی ہے۔ چونکہ ممکنہ طور پر سارا دن گھر کے کپڑون میں رہنا پرکشش ہوسکتا ہے، تاہم ہماری شناخت، خود اعتمادی اور مقصد کے لئے روزمرہ کے معمولات میں ایک نظم و ضبط اور ترتیب ضروری ہوتی ہے۔ لہٰذا اپنے دن کا آغاز تقریباً اسی وقت کرنے کی کوشش کریں جب آپ عام طور پردفتر جانے کے لیے کیا کرتے ہیں۔ ہر دن چہل قدمی کرنے، تفریح، سماجی میل جول اور غور و فکر کے لئے ایک وقت مقرر کریں۔
متحرک رہیں
متحرک رہنا ذہنی تناؤ کم کرتا ہے، توانائی میں اضافہ کرتا ہے، آپ کو زیادہ چوکس بنا دیتا ہے اور بہتر نیند حاصل کرنے میں مدد دیتا ہے۔ اپنے دن کے دوران جسمانی نقل و حرکت اور مصروفیات کو شامل کرنے کے مختلف طریقے تلاش کریں اور کچھ ایسے کام دریافت کریں جو آپ کے لئے بہترین ثابت ہوں۔
یہاں تک کہ گھر پر رہتے ہوئے بھی اپنے جسم کو متحرک رکھنے اور ورزش کرنے کے بہت سارے طریقے موجود ہیں۔
تفریح کے مواقع پیدا کریں
آرام کرنا اور موجودہ صورتحال پر توجہ دینا آپ کی ذہنی صحت کو بہتر بنانے اور منفی احساسات کو ہلکا کرنے میں مدد فراہم کرتا ہے۔ مراقبہ کرنے اور سانس لینے کی چند ایک مشقیں آزمائیں تاکہ پتا چلے کہ آپ کو کس چیز سے مدد ملتی ہے۔ مثال کے طور پر بعض اوقات آپ اتنے زیادہ تناؤ کا شکار ہو جاتے ہیں کہ آپ کو یاد ہی نہیں رہتا کہ سکون کا احساس کیسا ہوتا ہے۔ جب آپ پر تناؤ کا غلبہ چھا جائے تو پٹھوں کو بتدریج ڈھیلا چھوڑنے کا عمل آپ کو یہ جاننا سکھاتا ہے کہ پرسکون کس طرح ہونا ہے۔
رابطہ میں رہیں
اپنےساتھی کارکنان، دوستوں، کنبے اور دیگر افراد کے ساتھ رابطے میں رہنے کے تخلیقی طریقے تلاش کریں تاکہ آپ (اور وہ) زیادہ مربوط اور ایک دوسرے کی سپورٹ محسوس کرسکیں۔ آپ رابطے کے وہ طریقے تلاش کریں جو آپ کے کام آ سکتے ہوں خواہ وہ بذریعہ فون، سوشل میڈیا یا بذریعہ ویڈیو گفتگو ہوں۔ یہ عمل ویڈیو پر چائے کا ایک کپ شیئر کرنے سے لے کر ایک ساتھ آن لائن گیم کھیلنے یا محض ایک حوصلہ افزا ٹیکسٹ بھیجنے تک کچھ بھی ہو سکتا ہے۔
نیند کا خیال رکھیں
بے یقینی کا احساس اور روزمرہ زندگی میں تبدیلیوں کا مطلب یہ ہوسکتا ہے کہ آپ کو نیند لینے میں زیادہ دشواری کا سامنا ہے۔ اپنی نیند کو بہتر بنانے کے لیے آپ بہت کچھ کرسکتے/سکتی ہیں۔ یہاں تک کہ (اگر ممکن ہو سکے تو) ہفتے کے آخر میں بھی روزانہ کی طرح ایک ہی وقت پر بستر پر جانے اور ایک ہی وقت پر بیدار ہونا مقصد بنائیں، اور جہاں ممکن ہو سکے دھوپ حاصل کرنے کی کوشش کریں۔ اس سے آپ کی جسم کو منظم ہونے میں اور آپ کو بہتر نیند لینے میں مدد ملتی ہے۔ بستر پر جانے کے وقت سے کم از کم ایک گھنٹہ قبل اپنے فون، ٹیبلٹ، کمپیوٹر یا ٹی وی کو استعمال کرنا بند کر دیں۔
