عُمر شریف بادشاہ تھے: ہمایوں سعید

پاکستان فلم و ٹی وی انڈسٹری کے معروف اداکار ہمایوں سعید کی جانب سے بھی کامیڈین کنگ عُمر شریف کے انتقال پر گہرے رنج و غم کا اظہار کیا گیا ہے۔

ہمایوں سعید نے سوشل میڈیا پر جاری کیے گئے پیغام میں کہا کہ ’عُمر شریف کے انتقال کے بارے میں جان کر بہت دُکھ ہوا۔‘

اداکار نے لکھا کہ ’وہ بلا شبہ حتمی کامیڈی کنگ تھے، عُمر بھائی! ہم آپ کو یاد کریں گے۔‘

اُنہوں نے مرحوم عُمر شریف کی مغفرت کے لیے دُعا بھی کی۔

واضح رہے کہ لیجنڈ کامیڈین عمر شریف طویل علالت کے بعد جرمنی کے اسپتال میں انتقال کر گئے۔

بھارت کے کامیڈین عمر شریف کو استاد مانتے ہیں: شکیل صدیقی

سینئر اداکار شکیل صدیقی نے کہا ہے کہ بھارت میں جتنے بھی کامیڈین ہیں سب عمر شریف کواستاد مانتے ہیں۔

اداکار عمر شریف 4 روز سے جرمنی کے اسپتال میں داخل تھے ، انہیں کراچی سے واشنگٹن علاج کیلئے پہنچایا جارہا تھا لیکن ناساز طبیعت کے باعث انہیں جرمنی کے اسپتال میں ہی داخل کردیا گیا تھا۔

لیجنڈری اداکار و کامیڈین عمر شریف کافی عرصے سے عارضہ قلب ، گردے اور دیگر مختلف بیماریوں میں مبتلا تھے۔

کپل شرما بھی عُمر شریف کے انتقال پر افسردہ

بھارت کے معروف کامیڈین اسٹار کپل شرما کی جانب سے بھی کامیڈین کنگ عُمر شریف کے انتقال پر شدید دُکھ کا اظہار کیا گیا ہے۔

خیال رہے کہ عمر شریف نے اپنے کیریئر کا آغاز 1974میں 14سال کی عمر میں اسٹیج اداکاری سے کیا تھا اور 1980 میں پہلی مرتبہ آڈیو کیسٹ پر اپنے ڈرامے ریلیز کیے تھے۔

عمر شریف ٹی وی، اسٹیج اداکار، فلم ڈائریکٹر کے طور پر جانے جاتے ہیں، انہوں نے اسٹیج و تھیٹر ناصرف ملک میں بلکہ سرحد پار بھی بہت مقبولیت حاصل کی۔

عمر شریف کے انتقال سے لگتا ہے کہ ہمارے والد کا انتقال ہوگیا: رؤف لالا

کامیڈین کنگ عُمر شریف کے ساتھی کامیڈی اداکار رؤف لالا نے کہا ہے کہ عمر شریف کے انتقال سے لگتا ہے کہ ہمارےوالد کا انتقال ہوگیا۔

انہوں نے تقریبا 5 دہائیوں تک شوبز میں کام کیا ہے اور درجنوں، ڈراموں، اسٹیج تھیٹرز اور لائیو پروگرامز میں پرفارم کیا۔