• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پی سی بی نے وسیم اکرم کی پہلی ہیٹ ٹرک کی یاد تازہ کردی

پاکستان کرکٹ بورڈ (پی سی بی) نے قومی کرکٹ ٹیم کے سابق فاسٹ بولر وسیم اکرم کی ون ڈے کرکٹ میں پہلی ہیٹ ٹرک کی یاد تازہ کی ہے۔

وسیم اکرم نے آج ہی کے دن 1989میں ویسٹ انڈیز کیخلاف میچ میں مسلسل تین گیندوں پر تین کھلاڑیوں کو پویلین کی راہ دکھائی تھی۔

پی سی بی نے تقریباً 32 برس بعد وسیم اکرم کی یادگار بولنگ کی یاد تازہ کرتے ہوئے ٹوئٹر پیغام جاری کیا ہے۔

وسیم اکرم کا شمار کرکٹ کی دنیا کے عظیم کھلاڑیوں میں ہوتا ہے،  وسیم اکرم نے 23 سال کی عمر میں اپنی تیز ترین بولنگ سے کرکٹ کی دنیا میں طوفان برپا کردیا تھا۔

وسیم اکرم نے تاریخ 14 اکتوبر 1989 میں  شارجہ کے مقام پر کھیلے جانے والے میچ میں ویسٹ انڈیز کی ٹیم کو مشکلات سے دوچار کیا تھا۔

وسیم اکرم کی ہیٹ ٹرک کا شکار ہونے والے تینوں ویسٹ انڈیز کے کھلاڑی جیف ڈوجن ، میلکم مارشل اور کرٹلی امبروز سوئنگنگ ڈیلیوریز سے آؤٹ ہوئے۔

وسیم اکرم اُس وقت یہ شاندار اعزاز اپنے نام کرنے والے ون ڈے کرکٹ میں  چوتھے بولر بنے تھے۔

اس میچ میں شاندار پرفارمنس دکھانے اور پاکستان کی فتح میں اہم کردار ادا کرنے پر انہیں مین آف دی میچ کے ایوارڈ سے بھی نوازا گیا تھا۔

خیال رہے کہ وسیم اکرم ٹیسٹ کرکٹ میں ہیٹ ٹرک کرنے والے پہلے پاکستانی بولر ہیں، انہوں نے یہ ہیٹ ٹرک 1999 میں سری لنکا کے خلاف لاہور ٹیسٹ میں کی تھی۔

کھیلوں کی خبریں سے مزید