آذربائیجان کی آزادی کی 25 ویں سالگرہ پر کانفرنس کا انعقاد

اسلام آباد(صالح ظافر)پاکستان اور آذربائیجان کے مابین آئندہ آنے والے دنوں میں  تعلقات میں  مزید بہتری پیدا ہوگی، ان خیالات کا اظہار آذربائیجان کی آزادی کی بحالی کی 25 ویں سالگرہ کے حوالے سے منعقد ہونے والی کانفرنس میں شرکا نے خطاب کرتے ہوئے کیا۔ کانفرنس میں وفاقی وزیر برائے معیشت اور تجارت  خرم دستگیر نے دونوں برادر ممالک کے مابین مستقبل میں تعاون کے امکانات پر روشنی ڈالی۔ انہوں نے گزشتہ ماہ وزیراعظم نواز شریف کے  آذربائیجان کے دارالحکومت باکو کے دورے کا ذکر کیا، جہاں دونوں ممالک نے کاروبار، تجارت، سرمایہ کاری، صنعت اور دفاع سمیت مختلف شعبوں میں تعلقات کو بڑھانے کا فیصلہ کیا گیا۔ آذربائیجان کے سفیر علی علیزادہ نے اس امید کا اظہار کیا کہ آذربائیجان کے صدر الہام علیووف دونوں ممالک کے تعلقات کو نئی بلندیوں تک لے جائیں گےجیسا کہ وزیراعظم نواز شریف کے آذربائیجان کے حالیہ دورے کے دوران اتفاق ہوا تھا۔ آذربائیجان مشن کے ڈپٹی ہیڈ چنگیز قاریبالی نے دونوں برادر ممالک کے تعلقات میں دلچسپی لینے پر مہمانوں کا شکریہ ادا کیا۔سابق وزیر مملکت برائے داخلہ اور پی ٹی آئی کے مرکزی رہنما ڈاکٹر وسیم شہزاد نے اپنے خیالات کا اظہار کیا اور کہا کہ آذربائیجان ایک امن پسند ملک ہے۔