پاکستان کرکٹ ٹیم کے ہیڈ کوچ ثقلین مشتاق کا کہنا ہے کہ سہ فریقی سیریز کافی اہم ہے، اس سیریز میں خود کو ٹی ٹوئنٹی ورلڈ کپ کے لیے تیار کرنا ہے۔
نیوزی لینڈ میں میڈیا سے گفتگو کرتے ہوئے ثقلین مشتاق نے کہا کہ ٹی ٹوئنٹی کرکٹ میں کسی ٹیم کو چھوٹی ٹیم نہیں کہا جا سکتا، چھوٹے فارمیٹ میں اکثر چھوٹی غلطی بھی بہت بڑی غلطی بن جاتی ہے۔
ثقلین مشتاق کا کہنا ہے کہ ورلڈ کپ کو نظر میں رکھتے ہوئے میچز کھیلیں گے، جو چیزیں رہ گئی ہیں اس کو اس سیریز میں ٹیسٹ کر لیں گے۔
انہوں نے کہا کہ مختلف موسم میں کھیلنا کھیل کا حصہ ہے، اس کو اپنا کر ایڈجسٹ ہونا پڑتا ہے، اس سیریز میں بھی ہمیں یہاں کے موسم کے حساب سے کھیل بہتر کرنے کا موقع ملے گا۔
قومی ٹیم کے ہیڈ کوچ کا کہنا ہے کہ پاکستان نے گزشتہ ایک سال کے دوران کافی اچھی کرکٹ کھیلی ہے، ہم اس سیریز اور ورلڈ کپ میں اچھی کارکردگی کے لیے پر اعتماد ہیں۔