ہم کیسے بتا سکتے ہیں کہ ہمارے بچوں کا ٹیکنالوجی سے قائم کردہ تعلق صحت مند ہے؟ اور ہم اس بات کو یقینی بنانے کے لیے کیا اقدامات کرسکتے ہیں کہ آن لائن زندگی ان کی فلاح و بہبود کو نقصان نہ پہنچائے؟ اس حوالے سے ایک مطالعہ کچھ رہنمائی پیش کرتا ہے۔
صحت مند اور غیر صحت مند پیٹرن
ٹیکنالوجی کی حقیقی ’لت‘ بچوں کی اکثریت کے لیے مسئلہ نہیں ہوتی۔ یقیناً، بچوں کو ویڈیو گیمز کھیلنا پسند ہوتے ہیںاور وہ انھیںنان اسٹاپ کھیلتے ہیں۔ ہر بچہ مختلف ہوتا ہے، لہٰذا بہت سے عوامل کام کرتے ہیں، بشمول ان کی عمر اور ڈیویلپمنٹ کا مرحلہ، اس لیے اپنے بچے پر توجہ دینا ضروری ہے۔ جب آپ اپنے بچے کے اسکرین استعمال کا اندازہ لگانے کی کوشش کر رہے ہوں تو اس حوالے سے ایک مطالعہ واضح بصیرت پیش کرتا ہے۔
مرکزی مصنف، میگن مورینو نے تقریباً 4ہزار نوعمروں (13سے18 سال) اور ان کے والدین کا سروے کیا، جو ایک غیر معمولی طور پر بڑا گروپ ہے۔ مورینو کے پاس ڈیجیٹل میڈیا کے ’خراب‘ یا ’اچھے‘ ہونے کے بارے میں کوئی پیشگی مفروضہ نہیں تھا۔ اس کے بجائے، انھوں نے بہبود اور خطرناک روّیوں کے بارے میں پوچھا، اور پھر عام نمونوں کو تلاش کرنے کے لیے ڈیٹا کا تجزیہ کیا۔
اس میں دو الگ الگ گروپ ابھرے۔ ایک گروپ، اکثریت (63فیصد) بالکل ٹھیک تھی۔ ٹیکنالوجی کے ساتھ ان کا ناطہ ان کی زندگیوں پر اثر انداز نہیں ہوتا تھا۔ مثال کے طور پر، ان کی صحت اور تندرستی مثبت تھی، جیسے کم اضطراب اور زیادہ نیند۔ ایک اہم عنصر یہ تھا کہ نوعمروں نے ٹیکنالوجی کے ذریعے اپنے خاندانوں کے ساتھ کس طرح مشغولیت رکھی۔ والدین اور سرپرست اپنے بچوں کے ساتھ ان کے دیکھے یا کھیلے گئے مواد اور ان کی آن لائن زندگی کے بارے میں بات چیت کر رہے تھے۔
اس گروپ سے معلوم ہوا کہ ان کے پاس مواد کی رسائی کے حوالے سے سخت قوانین ہیں بجائے اس کے کہ انہیں اسکرین پر کتنا وقت گزارنے کی اجازت ہے۔ اس حوالے سے امریکن اکیڈمی آف پیڈیاٹرکس اور بہت سے دوسرے ماہرین، والدین کو سالوں سے مشورہ دے رہے ہیں۔ اس گروپ میں والدین اور سرپرستوں نے بھی اپنی ٹیکنالوجی کے استعمال کی نگرانی کی۔ خاص طور پر، انہوں نے سوشل میڈیا پوسٹ کرنے اور چیک کرنے میں کم وقت صرف کیا۔
مورینو کے مطالعہ میں دوسرا گروپ (37فیصد) اپنے ساتھیوں کے مقابلے میں ٹیکنالوجی کے ساتھ زیادہ مشکل تعلق رکھتا تھا اور کم صحت مند طرز عمل پر عمل پیرا تھا۔ مثال کے طور پر، وہ کم سوتے تھے اور ان کا جسم بھی بہتر حالات میں نہیں تھا۔ ٹیکنالوجی واضح طور پر ان نتائج میں ایک عنصر تھی، لیکن ایک بار پھر، اس کا تعلق خاندانی طرز عمل سے تھا۔ اس گروپ میں، والدین کے پاس اپنے بچوں کی ویڈیو گیمز اور سوشل میڈیا تک رسائی کے لیے وقت کے سخت قوانین تھے، لیکن انھوں نے مواد کے سخت قوانین نہیں بنائے تھے۔ یہ پہلے گروپ کے بالکل برعکس تھا۔
اس گروپ کے والدین نے بھی سوشل میڈیا کا کثرت سے استعمال کیا، یہی وجہ ہے کہ نوعمروں نے اپنے والدین کے ساتھ کم رابطے کا بتایا۔ اس مطالعے میں ایک نوعمر نے اپنی میڈیا لائف کے بارے میں بتاتے ہوئے کہا، ’’میری امی مسلسل اپنے فون پر مصروف رہتی ہیں، اکثر ایسا ہوتا ہے کہ وہ مجھے سن بھی نہیں پاتیں، اس لیے میں بھی اپنے فون پر مصروف ہوجاتا ہوں‘‘۔ اس گروپ کے نوعمروں نے یہ بھی کہا کہ انہیں اپنا پہلا موبائل فون یا تو 11 سال کی عمر سے پہلے یا 15 سال کی عمر کے بعد ملا۔
والدین کیلئے تین ٹیک ٹپس
جب بچوں کو مسائل درپیش ہوتے ہیں، تو لوگ میڈیا کی طرف اشارہ کرتے ہیں۔ پرتشدد ویڈیو گیمز کو اسکول کی فائرنگ کا ذمہ دار ٹھہرایا جاتا ہے، اور سوشل میڈیا اور اسمارٹ فونز کو ذہنی صحت کے بحران کا ذمہ دار ٹھہرایا جاتا ہے۔ پھر بھی تحقیق سے پتہ چلتا ہے کہ بہت سے بڑے مسائل جیسے کہ عدم مساوات، آب و ہوا، تعلیم، اور بہت کچھ نوجوانوں کو متاثر کرتے ہیں۔
وبائی مرض کے دوران، سوشل میڈیا ان لوگوں کے لیے لائف لائن تھا جو گھر میں تنہائی یا بوریت محسوس کرتے تھے۔ لہٰذا اگر آپ اپنے بچے کے اسکرین ٹائم کے بارے میں فکر مند ہوں، تو یہ تجویز کیا جاتا ہے کہ آپ بڑی تصویر دیکھیں اور سائنس پر بھروسا کریں۔ آپ صرف اپنے بچے کو ایسے ٹولز تیار کرنے میں مدد کر سکتے ہیں جو بچوں کے اس گروپ میں شامل ہوں جو ٹیکنالوجی کو مثبت طریقے سے استعمال کرتے ہیں یا کم از کم، اپنے خوف کو کم کریں۔
مورینو کے مطالعہ اور اس جیسے دیگر لوگوں کو دیکھتے ہوئے، ذیل میں درج چند اہم اقدامات آپ کے بچے کو ڈیجیٹل دور میں ترقی کی منازل طے کرنے میں مدد کر سکتے ہیں۔
1- مواد اور مواصلات پر مرکوز گھریلو قواعد بنائیں اور برقرار رکھیں۔ اس سے آپ کو یہ فیصلہ کرنے میں مدد مل سکتی ہے کہ آپ کے بچے کو خود کیا کرنے کی اجازت ہے اور کس چیز کی اجازت طلب کرنی ہے۔ اپنے بچے سے پوچھیں کہ وہ کیا کھیل رہا ہے یا دیکھ رہا ہے اور ان کے میڈیا کی دنیا میں صحیح معنوں میں مشغول ہونے کی کوشش کریں۔ ان کا نقطہ نظر جاننے کے لیے کھلے رہیں اور انھیں اپنا حصہ ڈالنے دیں۔ اور اگر آپ پریشان ہیں کہ آپ کا بچہ اسکرین پر بہت زیادہ وقت گزار رہا ہے، تو ڈاکٹر آپ کو یہ سمجھنے میں مدد کرسکتا ہے کہ آیا آپ کو دیگر پیشہ ورانہ مدد حاصل کرنی چاہیے یا نہیں۔
2- اپنی خود کی ٹیکنالوجی کے استعمال سے آگاہ رہیں، خاص طور پر گھر میں اور سوشل میڈیا استعمال کرتے وقت۔ جب بچہ آپ سے سوالات پوچھتا ہے یا آپ کی توجہ حاصل کرنے کی کوشش کرتا ہے تو کیا آپ اپنی اسکرین کو دیکھ رہے ہوتے ہیں؟ اگر ایسا ہے تو، اپنے موبائل کو نیچے رکھیں اور انہیں بھرپور توجہ دیں۔ اس قسم کی رول ماڈلنگ ان کے موبائل استعمال کو تشکیل دینے میں بہت آگے جا سکتی ہے۔
3- جلد شروع کریں اور اپنے بچے کی تنقیدی سوچ تیار کرنےمیں مدد کریں۔ اپنے بچے کو یہ سکھانا کہ اپنی چیزوں کا انتخاب خود کیسے کرنا ہے، یہاں تک کہ جب آپ ان کے میڈیا کے استعمال پر مکمل کنٹرول رکھتے ہوں، تو عمر بڑھنے کے ساتھ ساتھ خود کو منظم کرنے میں اپنی مدد کرنے میں کافی حد تک مدد ملے گی۔ ان کے اپنے انتخاب کے بارے میں سوچنے کی ترغیب دینے کے لیے مثبت نتائج استعمال کریں۔ انہیں تربیت دیں کہ وہ جو مواد استعمال کرتے ہیں اس کے بارے میں سوچیں، ان سے دریافت کریں کہ آپ نے میڈیا کے ایک حصے کو کیوں ہاں اور دوسرے کو کیوںنہ کہا ہے، تاکہ وہ آپ کی اقدار کو اپنانا شروع کر سکیں۔