پدماوت، کاسٹ عدم تحفظ کا شکار ،تشہیر سے گریزاں

17 جنوری ، 2018

بولی وڈ فلم ’پدماوت‘ کے خلاف طویل عرصے سے جاری مظاہروں اور احتجاج کے بعد آخر کار اسے رواں ماہ ریلیز کرنے کا ارادہ کرلیا گیا ہے، تاہم دکھ کی بات یہ ہے کہ فلم کی مرکزی کاسٹ اس کی پروموشن کرتی نظر نہیں آئے گی۔

مڈ ڈے کی رپورٹ کے مطابق ’پدماوت‘ پر جاری تنازعات کے باعث فلم ساز نے کاسٹ کی سیکورٹی کے لیے یہی بہتر سمجھا ہے کہ اس فلم کی تشہیر نہ کی جائے۔ان کا ماننا ہے کہ وہ فلم کی پروموشنز کے دوران اداکاروں کی جانب سے دیے گئے بیان یا کسی اور مسائل کے باعث مزید مشکل میں گرفتار نہیں ہونا چاہتےاور یہی وجہ ہے کہ فلم کے مرکزی اداکار ’پدماوت‘ کے بجائے اس وقت اپنے دوسرے پروجیکٹس اور کاموں میں مصروف ہیں۔

خیال رہے کہ فلم ’پدماوت‘ میں دپیکا پڈوکون رانی پدمنی کا کردار ادا کرتی نظر آئیں گی جبکہ شاہد کپور ان کے شوہر راجا راول رتن سنگھ بنے ہیں، رنویر سنگھ فلم میں علاؤالدین خلجی بادشاہ بنے ہیں۔

اس فلم کے خلاف مظاہروں کا آغاز گزشتہ سال اس وقت ہوا جب ایسی قیاس آرائیاں سامنے آئیں کہ سنجے لیلا بھنسالی اپنی فلم میں رانی پدماوتی اور علاؤالدین خلجی کے درمیان نامناسب سین پیش کریں گےجس کے بعد انتہاپسندوں نے جہاں شوٹنگ کے دوران بھی فلم کی ٹیم پر حملہ کیا، وہیں انہوں نے فلم کو نمائش کے لیے پیش کیے جانے پر بھارت کی مختلف ریاستوں میں سینما گھروں کو جلانے کی دھمکی بھی دی۔

ہندو انتہاپسندوں کا سلسلہ صرف سینما گھروں کو جلانے تک محدود نہیں رہا بلکہ انہوں نے فلم میں ’پدماوتی‘ کا کردار ادا کرنے والی اداکارہ دپیکا پڈوکون کو قتل کرنے اور ان کی ناک کاٹنے کی دھمکی بھی دی تاہم اب سنسر بورڈ سے ریلیز سرٹیفیکیٹ ملنے کے بعد اسے رواں ماہ 25 تاریخ کو ریلیز کرنے کا فیصلہ کیا گیا ہےلیکن اس وقت بھی ہندوستان کی بہت سی ریاستوں میں فلم ’پدماوت‘ کی ریلیز پر پابندی عائد کردی گئی ہے۔

تازہ ترین