شامی فورسز نے دمشق کے علاقے مشرقی غوتاپر چوتھے روز بھی بمباری کی جس کے نتیجے میں 35افراد ہلاک ہوگئے۔
شامی تنظیم سیریئن آبزرویٹری برائے انسانی حقوق کے مطابق سرکاری فوج کے جنگی طیاروں نے جمعرات کے روز دارالحکومت دمشق کے نواحی علاقے مشرقی غوتا کے شہر سفیا کے مختلف حصوں پر شدید بمباری کی جس سے پورا علاقہ دھماکوں کی گونج سے لرز اٹھا اور متعدد عمارتیں منہدم ہوگئی۔اور پینتیس افراد ہلاک ہوگئے۔
بمباری میں 125افراد زخمی بھی ہوئے جن میں سے بیشتر کی حالت تشویش ناک بتائی جارہی ہے۔ طبی ذرائع کا کہنا ہے کہ مشرقی غوتامیں اس سال کے آغاز سے ہونے والی بمباری سے اب تک 369شہری ہلاک ہوچکے ہیں۔
دریں اثنا شامی حکومت کی اتحادی فورسز کے خلاف امریکی حملے کے نتیجے میں 100 سے زائد جنگجو ہلاک ہو گئے۔امریکی فوجی حکام کےمطابق شامی صدرکی حامی فوج پر حملہ اپنے دفاع میں کیا گیا جس میں تقریبا ً 100 سے زائد اہلکار ہلاک ہوئے،شام نے دیرالزور میں امریکی فوجی حملے کو جارحیت اور دہشتگردی کی حمایت قرار دیاہے۔