تزکیۂ نفس اور خود احتسابی

10 نومبر ، 2019

جب انسان مسائل کے بھنور میں بُری طرح پھنس چُکا ہو، نکلنے کی کوئی تدبیر نہ سوجھ رہی ہو، حسرت ویاس کے سائے گہرے ہوتے چلے جائیں، ہزارہا کوششوں کے با وجود بھی پریشانی کے بادل چھٹنے کا نام نہ لیں، تو اُس وقت اپنے اعمال پر ضرور نظرِثانی کرنی چاہیے کہ مصائب کا آنا صرف آزمائش نہیں، اللہ کی ناراضی بھی ہوتی ہے۔

غورو فکر کرنا چاہیے کہ کہیں ہم نے اللہ کی مخلوق کی اعانت سے منہ تو نہیں پھیر رکھا ، کسی یتیم کا مال تو غصب نہیں کیا، لین دین میں سود شامل کرکے اللہ سے اعلانِ جنگ کے مرتکب تو نہیں ہورہے، بغض و عناد کی ساری حدودو قیود پھلانگ کر کسی کی حق تلفی تو نہیں کررہے۔

ویسے تومشکل وقت ہرانسان کی زندگی میں آتا ہے، لیکن ’’ ہر مشکل کے ساتھ آسانی‘‘ اللہ ہی کا فرمان ہے۔سو، قدرتی آفات، مصائب، پریشانیوں، مصائب کا بار بار آنا ہمارے لیے انتباہ بھی ہو سکتاہے۔ ایسے حالات میں انسان کو خوداحتسابی کے ساتھ مسلسل استغفار اور صدقہ و خیرات سے کام لینا چاہیے۔تاکہ مشکل وقت جلد از جلدٹل جائے اور دنیا وآخرت کی سُرخ روئی حاصل ہو۔ (مہوش فہیم، اسلام آباد)

تازہ ترین