جونیئر کھلاڑیوں کی مدد کیلئے ٹورنامنٹ کھیل رہا ہوں، اعصام الحق

02 دسمبر ، 2021

پاکستان کے ٹینس اسٹار کا کہنا ہے کہ ٹورنامنٹ اسی لیے کھیل رہا ہوں کہ جونیئر کھلاڑیوں کی مدد کرسکوں۔

ایک بیان میں انہوں نے کہا کہ بدقسمتی ہے میرے اور عقیل خان کے بعد گیپ بہت زیادہ ہوگیا ہے، نوجوان کھلاڑیوں کے ساتھ ٹریننگ کر رہا ہوں تاکہ وہ سیکھیں۔

انہوں نے کہا کہ اگلے سال قازقستان کے نوجوان کھلاڑی کے ساتھ جوڑی بناؤں گا، ثانیہ مرزا کے ساتھ ٹینس کھیلنے کا تجربہ اچھا رہا۔

خیال رہے کہ کچھ روز قبل معروف پاکستانی آل راؤنڈر شعیب ملک کی اہلیہ، بھارتی ٹینس اسٹار ثانیہ مرزا نے پاکستانی ٹینس اسٹار اعصام الحق کے ساتھ نشتر پارک اسپورٹس کمپلیکس کے ٹینس کورٹ میں ٹریننگ کی تھی۔