فضل الرحمان 3 سال سے صرف تاریخیں دے رہے ہیں، فواد چوہدری

28 دسمبر ، 2021

وفاقی وزیر اطلاعات فواد چوہدری نے اپوزیشن اتحاد پی ڈی ایم کے سربراہ مولانا فضل الرحمان سے متعلق کہا ہے کہ وہ 3 سال سے تاریخیں دے رہے ہیں۔

کابینہ اجلاس کے بعد میڈیا بریفنگ میں فواد چوہدری نے کہا کہ فضل الرحمان کا خیال تھا کہ ہم حکومت پلٹ دیں گے، یہ ہر 3 مہینے بعد نئی تاریخ دیتے رہے ہیں۔

انہوں نے کہا کہ ان کے تین سال کے بیانات سامنے لانے چاہئیں، یہ اپنے کارکنوں کو صرف چورن بیچ رہے ہیں۔

وفاقی وزیر نے مزید کہا کہ اپوزیشن میں دیہاڑی دار سیاستدان ہیں، یہ اپنی دیہاڑی لگاتے ہیں، اپوزیشن میں رہ کر عمران خان نے انہیں ناکوں چنے چبوائے تھے۔

دوران گفتگو فواد چوہدری نے یہ بھی کہا کہ رانا شمیم کے بیان حلفی کے بعد معلوم ہوا کہ نواز شریف اینڈ کمپنی کتنا بڑا سیسیلین مافیا ہے۔

انہوں نے کہا کہ یہ عدالتوں پر دباؤ ڈال کر کیسز کو اپنے حق میں کروانا چاہتے ہیں، نواز شریف نے خود واپس نہیں آنا، انہیں ہم واپس لائیں گے۔

وفاقی وزیر نے یہ بھی کہا کہ برطانیہ کے ساتھ اس حوالے سے کافی حد تک معاملات طے ہوچکے ہیں، ایازصادق کے بیان سے تو جاتی امراء والوں کا دل ہی بیٹھ گیا ہے۔

اُن کا کہنا تھا کہ منی بجٹ نہیں، ہماری ایڈجسٹمنٹ ہے، بل اسی سیشن میں پاس ہوجائے گا، کابینہ میں اس پر ابتدائی بحث ہوئی ہے۔

فواد چوہدری نے کہا کہ اپوزیشن باتیں کرنے کی بجائے آئی ایم ایف کا متبادل سامنے لے کر آئے۔

انہوں نے کہا کہ نواز شریف، آصف زرداری جو پاکستان کے ساتھ کر گئے ہیں، اس کے نتیجے میں آئی ایم ایف کے پاس جانا پڑ رہا ہے۔

تازہ ترین