شہباز شریف کے پاس 2 ہی آپشن ہیں، لندن جائیں یا جیل: فواد چوہدری

31 دسمبر ، 2021

وفاقی وزیرِ اطلاعات و نشریات چوہدری فواد حسین کا کہنا ہے کہ شہباز شریف کو لگتا ہے کہ وہ ڈوب رہے ہیں تو سارا پاکستان ہی ڈوب رہا ہے، ان کے پاس 2 ہی آپشن ہیں، لندن جائیں یا پھر جیل جائیں۔

میڈیا سے گفتگو کرتے ہوئے فواد چوہدری نے کہا کہ وزیرِ خزانہ شوکت ترین نے فلم انڈسٹری کو بچانے کے لیے زبردست اقدامات کیے ہیں، درآمدی اشیاء پر ٹیکس رہے گا، باقی تمام چیزوں پر سے ٹیکس ختم کیا گیا ہے، اپنے فنکاروں کو تحفظ دینے کے لیے غیر ملکی مواد پر ٹیکس عائد کیا ہے۔

انہوں نے کہا کہ اپوزیشن کی قیادت مایوس ہے، وہ اسمبلی میں ہی نہیں آئی، یہ کہتے ہیں کہ پی ٹی آئی کے 29 ارکان نون لیگ سے رابطے میں ہیں، یہ تو پوری اپوزیشن پی ٹی آئی سے رابطے میں ہے۔

فواد چوہدری کا کہنا ہے کہ ہم تو چاہتے ہیں کہ عدالت نواز شریف کو واپس لانے کے لیے اقدامات کرے، ہماری درخواست یہ ہے کہ روزانہ کی بنیاد پر سماعت ہو۔

ان کا کہنا ہے کہ ہم نے ان 3 سال میں 32 ارب ڈالر کا قرضہ واپس کیا ہے، عمران خان وزیرِ اعظم نہ ہوتے تو ملک دیوالیہ ہو جاتا۔

وفاقی وزیرِ اطلاعات و نشریات نے کہا کہ اپوزیشن میدان میں آئے گی تو بات کریں گے، سیاست کرنے کا حق سب جماعتوں کو حاصل ہے۔

انہوں نے مزید کہا کہ ہم تو چاہتے ہیں کہ پیپلز پارٹی اور مسلم لیگ نون قومی سیاست کریں، آصف زرداری اور بلاول بھٹو زرداری لاہور آنا چاہتے ہیں تو آئیں۔

وفاقی وزیرِ اطلاعات و نشریات چوہدری فواد حسین نے یہ بھی کہا کہ 10 مرلے کے گھر میں نون لیگ اور پیپلز پارٹی کا جلسہ ہو جائے گا، سندھ میں پیپلزپارٹی کی حکومت اپنے ہی لوگوں سے خوفزدہ ہے۔

تازہ ترین