ٹیکنالوجی کے مستقبل کیلئے آرٹس اور ہیومینیٹیز ناگزیر

ٹائمز ہائر ایجوکیشن ورلڈ یونیورسٹی رینکنگ2022ء میں آرٹس اور ہیومینیٹیز کے مضامین کے لحاظ سے سرِفہرست قرار پانے والی دونوں یونیورسٹیز کا تعلق امریکا سے ہے۔ یہ دونوں یونیورسٹیز تاریخ، فلسفہ، پرفارمنگ آرٹس، زبان، ادب، دینیات اور فن تعمیر سمیت آرٹس اور ہیومینیٹیز کے مضامین کے ایک گروپ کے لیے دنیا کی بہترین یونیورسٹیز کے طور پر ایک مقام رکھتی ہیں۔ 

اسٹینفورڈ یونیورسٹی، جسے امریکا کی سیلیکون ویلی کے مرکز کے طور پر دیکھا جاتا ہے اور اس کے طلبا نے گوگل، سیسکو، ہیولٹ پیکارڈ، یاہو اور نیٹ فلکس کو تخلیق کیا ہے، وہ اس فہرست میں اوّل پوزیشن لینے میں کامیاب رہی ہے۔ میساچوسٹس انسٹیٹیوٹ آف ٹیکنالوجی (MIT) بالکل قریب رہی اور اس رینکنگ میں دوسرے نمبر پر رہی۔ 

عالمی سطح پر جانے مانے دیگر اعلیٰ ٹیک اسکولوں نے بھی اپنی آرٹس اور ہیومینیٹیز کی درجہ بندی کو بہتر بنایا ہے: نیدرلینڈ میں ڈیلفٹ یونیورسٹی آف ٹیکنالوجی پچھلے سال 65ویں سے 42ویں نمبر پر آگئی، سوئس فیڈرل انسٹیٹیوٹ آف ٹیکنالوجی (ای ٹی ایچ زیورخ کے نام سے معروف ہے) 53 سے بڑھ کر 49 ویں درجہ، جب کہ جارجیا ٹیک (جارجیا انسٹیٹیوٹ آف ٹیکنالوجی) دنیا کے ٹاپ 150 میں شامل ہوا۔

باہمی بصیرت اور تحقیق

ٹائمز ہائر ایجوکیشن کے لیے تحریر کردہ ایک مضمون میں، ایم آئی ٹی کے دو آرٹس اسکول ڈینز، آگسٹن رَیو (ہیومینیٹیز، آرٹس اینڈ سوشل سائنسز) اور ہاشم سرکیس (آرکیٹیکچر اینڈ پلاننگ) ایک بات پر واضح تھے: آرٹس اور ہیومینیٹیز کے شعبے - علم اور انسانی حالت کو سمجھنے کے طاقتور ذرائع کے طور پر - MIT کی تعلیم، تحقیق اور اختراع کا بنیادی حصہ ہیں۔

’’سائنس اور انجینئرنگ کی بصیرتیں، یقیناً، دنیا کے بہت سے فوری مسائل کو حل کرنے کے لیے بہت اہم ہیں۔ لیکن سائنس اور انجینئرنگ انسانی معاشروں کے اندر کام کرتی ہے اور انسانی وجود کی ثقافتی، سیاسی، مقامی اور اقتصادی پیچیدگیوں اور زمین پر رہنے کے طریقوں سے آگاہ ہونے پر دنیا کی بہترین خدمت کرتی ہے۔ سائنس/ٹیکنالوجی، آرٹس، ڈیزائن، اور ہیومنسٹ دائرہ کار بھی انسانی علم کے باہمی طور پر مطلع کرنے والے ذریعے ہیں اور آج کے بہت سے اثر پذیر مسائل کو صرف باہمی بصیرت اور تحقیق سے ہی حل کیا جا سکتا ہے‘‘۔

میٹاوَرس میں

جیسے جیسے ہم چوتھے صنعتی انقلاب میں تیزی سے آگے بڑھ رہے ہیں، ذہین ٹیکنالوجیز کا نیا دور نا صرف معیشتوں اور معاشروں میں ہمارے ماضی کے صنعتی انقلابات - بھاپ، اسٹیل، بجلی، پیٹرو کیمیکلز کے مقابلے میں زیادہ گہری تبدیلی لائے گا - یہ معاشرے کے تصور کو ہی بدل دے گا۔ یہ بات قابل ذکر ہے کہ جب فیس بک، جسے اب میٹا کہا جاتا ہے، نے ’’میٹاورس‘‘ تیار کرنے کے اپنے اگلے مرحلے ایک ’’توسیع شدہ حقیقت‘‘ کا اعلان کیا، جس میں ورچوئل اور آرگمینٹڈ ریالٹی شامل ہے، اسے ’’ذمہ داری کے ساتھ‘‘ ایسا کرنے کی ضرورت کی وضاحت دیتے ہوئے بہت محنت کرنا پڑی۔ ’’ہمیں انسانی حقوق اور شہری حقوق کی کمیونٹیز کو شروع سے ہی شامل کرنے کی ضرورت ہے تاکہ یہ یقینی بنایا جا سکے کہ ان ٹیکنالوجیز کی تخلیق اس طرح ہو کہ وہ جامع اور بااختیار ہوں‘‘، یہ کہنا ہے میٹا کے عالمی امور کے نائب صدر نک کلیگ کا۔ یونیورسٹیوں کے ساتھ پہلی تعلیمی تحقیقی شراکت داری جس کی میٹا نے تصدیق کی ہے، وہ اخلاقیات، رازداری، قانون، تنوع اور اجتماعی شمولیت سے متعلق منصوبوں پر ہے۔

جعلی خبروں اور سازشی نظریات کے اس دور میں، سب سے زیادہ تشویشناک طور پر کووِڈ-19ویکسینیشن اور موسمیاتی تبدیلی کے ارد گرد، ہمیں تنقیدی سوچ رکھنے والوں اور ابلاغ کرنے والوں کی ایک نئی نسل کی ضرورت ہے۔ وَبائی مرض کی وجہ سے بڑھی ہوئی گہری سماجی تقسیم کے ساتھ، قوم پرستی اور تحفظ پسندی کے عروج ،اور بڑھتے عالمی درجہ حرارت کے وجودی خطرے کے ساتھ، ہمیں اپنی مشترکہ زندگیوں کی یاد دِلانے، اپنے ماضی سے سبق سیکھنے اور ایک نئی نسل کی ضرورت ہے، جو طاقتور کے سامنے سچ بولنے کی ہمت رکھتی ہو۔

گزشتہ سال ورلڈ اکنامک فورم کی طرف سے شناخت کی گئی، آنے والے کل کی ٹاپ -10مہارتوں میں آرٹس اور ہیومینیٹیز کے شعبوں میں بہترین مہارتوں کا غلبہ تھا: تنقیدی سوچ اور تجزیہ؛ تخلیقی صلاحیت، اختراع اور پہل؛ قیادت اور سماجی اثر و رسوخ؛ استدلال اور مسئلہ حل کرنا۔

مصنوعی ذہانت ٹیکنالوجی کے مستقبل کی جانچ

نئی ٹیکنالوجی خاص طور پر مشین لرننگ اور مصنوعی ذہانت اس بارے میں بنیادی سوالات اٹھا رہی ہے کہ انسان کا کیا ہونا ہے۔ آکسفورڈ یونیورسٹی میں اخلاقیات (ایتھکس) اور قانونی (لیگل) فلسفہ کے پروفیسر اور انسٹیٹیوٹ فار ایتھکس اِن AI کے ڈائریکٹر جان تسیولس کہتے ہیں کہ دنیا کے لیے آرٹس اور ہیومینیٹیز کی شاید سب سے بنیادی خدمت ’’اس حقیقت کو واضح کرنا ہے کہ AI کی ترقی تقدیر کا معاملہ نہیں ہے، بلکہ یہ ہمارا انتخاب ہے، جس کے یکے بعد دیگرے کئی لہروں میں نتائج برآمد ہوں گے‘‘۔

آنجہانی طبیعیات دان اسٹیفن ہاکنگ نے مشہور طور پر کہا تھا کہ ’’AI انسانیت کے ساتھ پیش آنے والی اب تک کی سب سے بہترین یا بدترین چیز ہونے کا امکان ہے‘‘، اس خطرے کے ساتھ کہ انسانوں کو ذہین مشینوں کے ذریعے تیزی سے ناکارہ کیا جا سکتا ہے اور یہاں تک کہ اسے محکوم بنایا جا سکتا ہے۔ اگر ہماری یونیورسٹیوں میں آرٹس اور ہیومینیٹیز کی اسکالرشپ کو پھلنے پھولنے دیا جائے تو یقیناً انسانیت اس گہری تبدیلی والے انقلاب سے بہترین فائدہ اُٹھائے گی۔