تحریک عدم اعتماد پر کسی نے بات نہیں کی، عامر خان

08 فروری ، 2022

متحدہ قومی موومنٹ (ایم کیو ایم پاکستان) کے سینئر رہنما عامر خان کا کہنا ہے کہ جو مہنگائی بڑھی ہے اُس پر ہمیں حکومت سے شکایت ہے۔

جیو نیوز کے پروگرام ’آج شاہ زیب خانزادہ کے ساتھ ‘میں بات کرتے ہوئے عامر خان نے کہا کہ تحریک عدم اعتماد کے لیے ابھی تک ہم سے کسی نے بات نہیں کی ہے، شہباز شریف سے ملاقات کے بعد پارٹی رہنماؤں کے سامنے بات رکھیں گے۔

عامر خان کا کہنا تھا کہ سیاست میں کوئی چیز حرف آخر نہیں ہوتی۔ اگر کوئی تجویز آئی تو رابطہ کمیٹی کے سامنے رکھ کر اتفاق رائے سے فیصلہ کریں گے۔

قبل ازیں لاہور پریس کلب میں عامر خان نے میڈیا سے گفتگو کرتے ہوئے کہا کہ ہم نے اپنی غلطیوں پر کافی حد تک قابو پالیا ہے۔ ہم نے ایک نئی ایم کیو ایم روشناس کروائی جو عدم تشدد کے فلسفے پر یقین رکھتی ہے۔

عامر خان کا کہنا تھا کہ ہم سیاسی قائدین کا شکریہ ادا کرنے پنجاب آئے ہیں۔ ہم پنجاب کے دورے پر نکلے ہیں اور سیاسی قائدین سے ملاقاتوں کا سلسلہ شروع کیا ہے۔

قومی خبریں سے مزید