عاطف اسلم ’اسپاٹی فائے‘پر سب سے مقبول گلوکاروں میں سرفہرست

کراچی (مانیٹرنگ ڈیسک)دنیا کی سب سے بڑی آڈیو اسٹریمنگ میوزک ویب سائٹ’اسپاٹی فائے‘ نے ویب سائٹ پر سب سے زیادہ سنے جانے والے گلوکاروں کی فہرست جاری کی اور بتایا کہ عاطف اسلم پہلے نمبر پر رہے، جنہیں عالمی سطح پر سب سے زیادہ سنا گیا۔رپورٹ کے مطابق عاطف اسلم کے گانے ’کدی تے ہنس بول، جینا جینا اور تیرے سنگ یارا‘ ویب سائٹ پر سب سے زیادہ سنے جانے والے گانوں میں بھی شامل رہے۔’اسپاٹی فائے‘ پر دوسرے نمبر پر گلوکار راحت فتح علی خان رہے، تیسرے نمبر پر استاد نصرت فتح علی خان، چوتھے نمبر پر مومنہ مستحسن جب کہ پانچویں نمبر پر بلال سعید رہے۔دنیا کی سب سے بڑی آڈیو اسٹریمنگ میوزک ویب سائٹ نے پاکستان میں اپنی سروس کو ایک سال مکمل ہونے پر اعداد و شمار جاری کرتے ہوئے کہا ہے کہ دنیا میں پاکستانی موسیقی سننے میں 223 فیصد اضافہ دیکھا گیا۔یاد رہے کہ ’اسپاٹی فائے‘ نے 25 فروری 2021 کو پاکستان میں اپنی سروس کا آغاز کیا تھا اور تب سے اب تک اس پر درجنوں گلوکاروں و موسیقاروں نے اپنی موسیقی متعارف کرائی ہے۔اپنی سروس کو ایک سال مکمل ہونے پر ’اسپاٹی فائے‘ نے اعداد و شمار جاری کرتے ہوئے بتایا کہ گزشتہ ایک سال کے دوران گلوکاروں نے 19 ہزار 590 گانے ویب سائٹ پر جاری کیے۔اعداد و شمار کے مطابق مجموعی طور پر پاکستانی موسیقی کو عالمی سطح پر سنے جانے میں 223 فیصد اضافہ دیکھا گیا جب کہ امریکا، کینیڈا، برطانیہ اور جرمنی میں پاکستانی موسیقی کو سننے میں 23 فیصد اضافہ ریکارڈ کیا گیا۔’اسپاٹی فائے‘ کے مطابق دلچسپ بات یہ ہے کہ پاکستان کی فوک موسیقی کو سنے جانے میں بھی حیران کن اضافہ ہوا اور مجموعی اضافہ 150 فیصد تک ریکارڈ کیا گیا۔پاکستانی فوک موسیقی کو امریکا میں سنے جانے میں بھی 11 فیصد اضافہ دیکھا گیا۔ لوکل ہپ ہاپ موسیقی کو سب سے زیادہ پاکستان سے باہر سنا گیا۔