فرمان الہی
نماز کے اوقات
پاکستان اور آسٹریلیا کے درمیان سیریز کے تیسرے ٹیسٹ میچ کا دوسرا دن ختم ہوگیا، جہاں پاکستان ٹیم نے ایک وکٹ کے نقصان پر 90 رنز بنالیے جبکہ اسے مہمان ٹیم کی برتری ختم کرنے میں مزید 301 رنز درکار ہیں۔
قذافی اسٹیڈیم لاہور میں جاری اس میچ میں آسٹریلوی ٹیم پہلی اننگز میں 391 رنز بنا کر آؤٹ ہوگئی تھی۔
قومی ٹیم کو پہلی اننگز میں جلد ہی امام الحق کی وکٹ کا نقصان اٹھانا پڑا تھا، وہ 20 کے مجموعی اسکور پر 11 رنز بنا کر آوٹ ہوئے۔
اس کے بعد سے نوجوان عبداللّٰہ شفیق اور اظہر علی نے 70 رنز کی پارٹنرشپ بناکر دن کا اختتام مثبت انداز میں کیا، دونوں بالترتیب 45 اور 30 رنز پر ناقابلِ شکست ہیں اور تیسرے روز کھیل کا آغاز کریں گے۔
اس سے قبل لاہور ٹیسٹ کے دوسرے دن کھیل کا پہلا سیشن مہمان بلے بازوں کے نام رہا، پاکستانی بولرز کوئی وکٹ حاصل نہ کرسکے۔
مہمان ٹیم نے پہلے سیشن میں ٹیم کے اسکور کو بغیر کسی نقصان 320 رنز تک پہنچایا، کیمرون گرین اور ایلکس کیری نے اپنی نصف سنچریاں مکمل کیں۔
کھانے کے وقفے کے بعد قومی ٹیم نے 63 رنز بنانے والے ایلکس کیری اور 79 رنز پر موجود کیمرون گرین کی وکٹ حاصل کی۔
ایلکس کیری کو نعمان علی نے ایل بی ڈبلیو کیا جبکہ کیمرون گرین کو نسیم شاہ نے بولڈ کیا اور یوں آسٹریلوی ٹیم 353 پر 7 وکٹوں سے محروم ہوئی۔
اس کے بعد آسٹریلوی ٹیل اینڈرز نے آل آؤٹ ہونے تک اسکور کو 391 رنز تک پہنچایا۔
پاکستان کی جانب سے شاہین شاہ آفریدی اور نسیم شاہ کے حصے میں چار چار وکٹیں آئیں جبکہ نعمان علی اور ساجد خان ایک ایک وکٹ لے سکے۔
گزشتہ روز پاکستان کی جانب سے شاہین آفریدی نے ایک ہی اوور میں وارنر اور لبوشین کو چلتا کیا تھا، عثمان خواجہ 91 اور اسمتھ 59 رنز بناکر نمایاں رہے تھے۔
نسیم شاہ نے بھی 2 کھلاڑیوں کو پویلین بھیجاجبکہ ایک وکٹ ساجد خان نے حاصل کی تھی۔
پاکستان کرکٹ بورڈ نے اپنے ٹوئٹر اکاؤنٹ پر لاہور ٹیسٹ کے پہلے دن کے کھیل پر مشتمل ایک مختصر ویڈیو بھی شیئر کی تھی۔
