اگلے انتخابات میں عمران خان دو تہائی اکثریت ووٹوں سے منتخب ہوں گے، شیخ رشید

03 اپریل ، 2022

سابق وفاقی وزیر داخلہ شیخ رشید احمد نے کہا ہے کہ اپوزیشن نے عمران خان کو مقبول بنادیا، اگلے انتخابات میں عمران خان دو تہائی اکثریت ووٹوں سے منتخب ہوں گے۔

اسلام آباد میں پریس کانفرنس کرتے ہوئے شیخ رشید احمد کا کہنا تھا کہ ایک ماہ سے کہہ رہا تھا چیری بلاسم والوں کی اچکنیں نیکریں بنیں گی، خود تو یہ اس قابل نہیں رہ گئے کہ اپنے حلقوں میں جا سکیں، یہ جو انہوں نے 18، 18 کروڑ روپے لیا یہ پناہ گاہوں کو دے دیں۔

شیخ رشید کا یہ بھی کہنا تھا کہ تین تجاویز تھیں، اس میں بڑوں کی رائے بھی شامل تھی۔

انہوں نے کہا کہ نئے الیکشن کے لیے میں دو مہینے سے رو رہا ہوں، میں تو ایمرجنسی کی بات کرتا تھا، وزیراعطم نے مسترد کردی، پھر گورنر راج کا بھی وزیراعظم کا خیال تھا کہ ختم ہو جائے گا جبکہ میں نے گورنر راج کی بھی بات کی تھی۔

سابق وفاقی وزیر کا کہنا تھا کہ سوچ بچار کے بعد فیصلہ کیا گیا کہ انتخاب کا راستہ اختیار کیا جائے۔

انہوں نے یہ بھی کہا کہ سب سے زیادہ خوشی پاکستان میں محسوس کی جارہی ہے، خاص طور پر ہندوستان میں صف ماتم بچھ گئی ہے، بھارت سوچ رہا تھا کہ ان کے کاروباری شیئر ہولڈر آجائیں گے، بھارت کے 72 چینلز صف ماتم کررہے ہیں۔

شیخ رشید کا کہنا تھا کہ یہ میری خواہش تھی کہ حج کے بعد الیکشن ہو جائیں، میری خواہش تھی کہ صوبوں میں بھی اسمبلیاں توڑ دی جائیں، ابھی وزیراعطم نے اس پر کوئی فیصلہ نہیں لیا۔