وفاقی حکومت نے افغانستان سے ٹرانسپورٹرز کو 6 ماہ کا ملٹی پل ویزہ دینے کا فیصلہ کر لیا۔

وزیرِ اعظم میاں محمد شہباز شریف کی زیرِ صدارت وفاقی کابینہ کا اجلاس ہوا جس میں یہ بڑا فیصلہ سامنے آیا ہے۔

اس فیصلے سے وسطِ ایشیاء اور افغانستان میں تجارت کو تقویت ملے گی۔

وفاقی کابینہ اجلاس میں اہم فیصلے

وزیراعظم شہباز شریف نے وفاقی کابینہ اجلاس میں گورنر پنجاب کو عہدے سے ہٹانے کی منظوری دے دی۔

وفاقی کابینہ کے ہونے والے اجلاس میں 7 نکاتی ایجنڈا منظور کر لیا گیا۔

اجلاس میں وفاقی کابینہ نے قومی ویسٹ مینجمنٹ پالیسی 2022ء منظور کر لی۔

وفاقی کابینہ نے اجلاس کے دوران مختلف ممالک سے متعلق ویزا پالیسی میں تبدیلی کا ایجنڈا منظور کیا۔

کابینہ کے اجلاس میں اقتصادی رابطہ کمیٹی کے 22 جون کے فیصلوں اور کابینہ کی لیجسلیٹو کمیٹی کے 23 جون کے فیصلوں کی توثیق کی گئی۔

اجلاس میں وفاقی کابینہ نے الیکٹرک پنکھوں کے توانائی سے متعلق معیار مقرر کرنے کی منظوری بھی دی۔

وفاقی کابینہ نے حج پالیسی 2022ء کا نیا مسودہ بھی منظور کر لیا۔

مریم اورنگزیب نے کیا کہا؟

وفاقی کابینہ کے اجلاس کے حوالے سے وفاقی وزیرِ اطلاعات و نشریات مریم اورنگزیب نے بتایا ہے کہ کابینہ نے پولیو ٹیم پر حملے کی مذمت کی ہے۔

انہوں نے بتایا کہ کابینہ کی جانب سے وزیرِ داخلہ رانا ثناء اللّٰہ کو ہدایت کی گئی ہے کہ پولیو ٹیم پر حملے سے متعلق فوری رپورٹ پیش کریں۔

مریم اورنگزیب نے یہ بھی بتایا کہ وفاقی کابینہ کے اجلاس میں نادرا کو آن لائن سسٹم میں تبدیلی کو یقینی بنانے کی ہدایت کی گئی ہے۔

کابینہ نے سنگِ میل پالیسی منظور کی: شیری رحمٰن

کابینہ کے اجلاس سے متعلق پاکستان پیپلز پارٹی کی نائب صدر، وزیرِ موسمیاتی تبدیلی سینیٹر شیری رحمٰن کا کہنا ہے کہ آج کی کابینہ نے ایک سنگِ میل پالیسی منظور کی ہے۔

وفاقی کابینہ کا اجلاس طلب، اہم فیصلے متوقع

وفاقی کابینہ کے اجلاس میں الیکشن کمیشن کی سال 2021 کی رپورٹ پیش کی جائے گی، کابینہ کی منظوری کے بعد الیکشن کمیشن کی رپورٹ پارلیمنٹ میں پیش ہوگی۔

انہوں نے کہا ہے کہ خطرناک فضلے کو ٹھکانے لگانے سے متعلق پالیسی بنائی گئی ہے، یہ خطرناک فضلہ ہم سب کی صحت کے لیے مضر ہے۔

وزیرِ موسمیاتی تبدیلی سینیٹر شیری رحمٰن کا یہ بھی کہنا ہے کہ یہ خطرناک فضلہ پانی کے ذخائر کو بھی آلودہ کرتا ہے۔