مشہور گانے ’کنا یاری‘ کا گلوکار بے گھر ہو گیا

22 اگست ، 2022

کوک اسٹوڈیو سیزن 14 کے بلوچی گانے ’ کنا یاری‘ سے شہرت حاصل کرنے والے گلوکار عبدالوہاب بگٹی کا بلوچستان میں سیلاب کے نتیجے میں گھر بہہ گیا ہے۔

گزشتہ روز سے عبدالوہاب بگٹی سے متعلق یہ خبر زیرِ گردش ہے جس نے اُن کے مداحوں کو خوب رنجیدہ کیا ہو اہے۔

سوشل میڈیا پر وائرل پوسٹس کے مطابق گلوکار وہاب علی بگٹی حالیہ بارشوں کے سبب شدید متاثر ہوئے ہیں اور بلوچستان میں آنے والے سیلاب میں اُن کا کچی مٹی سے بنا گھر بھی بہہ گیا ہے۔

سوشل میڈیا پر وائرل پوسٹس میں ’کنا یاری‘ گلوکار عبدالوہاب کو چند بچوں سمیت بے یار و مددگار کھڑے ہوئے دیکھا جا سکتا ہے۔

میڈیا رپورٹس کے مطابق بلوچستان کے علاقے نصیرآباد میں سیلابی صورتحال کے باعث عبدالوہاب اپنے اہل خانہ کے ہمراہ کُھلے آسمان تلے زندگی گزارنے پر مجبور ہیں۔

دوسری جانب سوشل میڈیا پر اب وائرل اِن پوسٹس کو دیکھ کر معروف شخصیات کی جانب سے عبدالوہاب کے لیے مدد کی اپیل اور اعلان کیا جا رہا ہے۔

موٹیویشنل اسپیکر منیبہ مزاری نے بھی اپنی ٹوئٹ میں عبدالوہاب کے حالات پر افسوس کا اظہار کیا ہے۔

گلوکارہ حدیقہ کیانی نے بھی کمنٹ کرتے ہوئے وہاب علی بگٹی اور بلوچستان کو درپیش سیلابی صورتحال پر تشویش کا اظہار کیا۔

معروف گلوکارہ حدیقہ کیانی نے اعلان کیا ہے کہ وہ عطیات جمع کر رہی ہیں اور جَلد ہی کوک اسٹوڈیو کے گلوکار وہاب علی بگٹی اور دیگر سیلاب زدگان کی مدد کے لیے بلوچستان پہنچنے والی ہیں۔