فرمان الہی
نماز کے اوقات
سندھ پولیس کے کاؤنٹر ٹیررازم ڈیپارٹمنٹ (سی ٹی ڈی) کے عملے نے کراچی کے علاقے گلستانِ جوہر سے کالعدم تنظیم کے ایک رکن کو گرفتار کیا ہے۔
ملزم پر کراچی کی طرز پر حیدر آباد میں بھی چائنیز ڈاکٹر کو ٹارگٹ کرنے کی سازش کا الزام ہے۔
سی ٹی ڈی کے ترجمان کی جانب سے جاری کیے گئے بیان کے مطابق سی ٹی ڈی آپریشن 2 کے عملے نے گلستانِ جوہر میں کامران چورنگی کے قریب کارروائی کے دوران کالعدم دہشت گرد تنظیم ایس آر اے کے رکن محمد افضل لونڈ عرف عافی کو گرفتار کیا ہے۔
پولیس کے مطابق ملزم کے قبضے سے 1 پستول اور موٹر سائیکل برآمد ہوئی ہے۔
سی ٹی ڈی کے ترجمان کے مطابق ملزم نے دورانِ تفتیش انکشاف کیا ہے کہ وہ جرمنی میں جلا وطن تنظیم کے سربراہ ذوالفقار خاصخیلی عرف سفیر سے براہِ راست رابطے میں ہے۔
ملزم کے مطابق خاصخیلی اس کی مالی معاونت کر رہا ہے، جس کی جانب سے بھیجے گئے پیسوں سے ملزم نے موٹر سائیکل اور اسلحہ خریدا ہے۔
ملزم کے مطابق ذوالفقار خاصخیلی نے اسے حیدر آباد میں چائنیز ڈینٹل کلینک کے ڈاکٹر کو قتل کرنے کا ٹارگٹ دیا تھا۔
ملزم نے مذکورہ ڈاکٹر کی ریکی بھی مکمل کر لی تھی، تاہم منصوبے پر عمل درآمد کرنے سے پہلے ہی اسے گرفتار کر لیا گیا۔
ترجمان کے مطابق گرفتار ملزم کراچی کے علاقے صدر میں چائنیز ڈینٹل کلینک پر ٹارگٹڈ کارروائی کرنے والے ملزمان کا ساتھی ہے جس سے مزید تفتیش کی جا رہی ہے۔
