دیامر میں گرلز اسکول جلا دیا گیا، دیگر اسکولوں کی سیکیورٹی سخت

گلگت بلتستان کے ضلع دیامر میں شرپسندوں کے ہاتھوں گرلز اسکول کو آگ لگا دی گئی، تاہم آج ہی اسکول کی مرمت کا کام شروع کر دیا گیا ہے۔

واقعے کا مقدمہ نامعلوم شر پسندوں کے خلاف درج کر کے علاقے میں واقع دیگر اسکولوں کی سیکیورٹی بڑھا دی گئی ہے۔

چیف سیکریٹری گلگت بلتستان کے مطابق داریل میں متاثرہ اسکول کی مرمت کا کام شروع کر دیا گیا ہے، ایک ہفتے میں اسکول کو فعال کر دیا جائے گا۔

پولیس کا کہنا ہے کہ داریل میں گرلز مڈل اسکول کو آگ لگانے کے بعد علاقے میں دیگر اسکولوں کی سیکیورٹی سخت کر دی گئی ہے اور گرلز اسکول کو آگ لگانے کے واقعے میں ملوث شرپسندوں کی تلاش جاری ہے۔

اسکول کو آگ لگانے کا مقدمہ نامعلوم شر پسندوں کے خلاف درج کر لیا گیا ہے۔

شرپسندوں نے گزشتہ روز 7 کمروں پر مشتمل اسکول کو آگ لگا دی تھی، جس سے عمارت متاثر ہوئی تھی اور فرنیچر جل گیا تھا۔