بھارت مذموم مقاصد میں کامیاب نہیں ہوگا، آرمی چیف

آرمی چیف جنرل عاصم منیر نے کہا ہے کہ بھارت کبھی اپنے مذموم مقاصد میں کامیاب نہیں ہوگا، گلگت بلتستان اور آزاد کشمیر سے متعلق بھارتی قیادت کے حالیہ غیر ذمے دارانہ بیانات کا نوٹس لیا ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف نے لائن آف کنٹرول کے رکھ چکری سیکٹر کا دورہ کیا، جہاں افسروں اور جوانوں سے گفتگو کی۔

جنرل عاصم منیر نے کہا کہ دشمن کی کسی بھی مہم جوئی کا بھرپور جواب دیں گے، پاکستان کی مسلح افواج وطن عزیز کے دفاع کےلیے ہمہ وقت تیار ہیں۔

آرمی چیف نے کہا کہ دنیا اقوام متحدہ کی قراردادوں کے مطابق کشمیری عوام سے کیا گیا وعدہ پورا کرے۔

آئی ایس پی آر کے مطابق آرمی چیف کو لائن آف کنٹرول کی تازہ صورتحال اور فارمیشن کی آپریشنل تیاریوں پر بریفنگ دی گئی۔