وزیر اعلیٰ کے پی نے بھی عمران خان کو شٹ اپ کال دیدی، شرجیل میمن

وزیر اطلاعات سندھ شرجیل انعام میمن کا کہنا ہے کہ وزیرِ اعلیٰ خیبرپختونخوا محمود خان نے بھی عمران خان کو شٹ اپ کال دے دی۔

ایک بیان میں شرجیل میمن اسمبلیاں تحلیل کرنے کا اعلان محض اعلان ہی رہا، پی ٹی آئی سیاسی جماعت نہیں، نوٹنکی کرنے والوں کا ٹولہ ہے۔

انہوں نے کہا کہ یہ لوگ قومی اسمبلی کے اسپیکر کے سامنے بھی پیش نہیں ہوئے، کے پی میں تو ان کو کسی نے نہیں روکا، اسمبلی کیوں نہیں تحلیل کی؟

شرجیل میمن کے عمران خان پر طنزیہ وار

اپنے بیان میں انہوں نے کہا کہ میری گھڑی میری مرضی، میری گوگی میری مرضی، میرے فارن اکاؤنٹس میری مرضی، میری منی لانڈرنگ میری مرضی۔

شرجیل میمن کا کہنا ہے کہ عمران خان بلیک میلنگ، دھونس اور دھمکی سے دوبارہ اقتدار چاہتے ہیں، ملک پر عمرانی ڈاکٹرائن مسلط کرنا چاہتے ہیں، کے پی میں امن و امان کی صورتحال سنگین ہے۔

ان کا مزید کہنا ہے کہ کے پی کا ڈپٹی اسپیکر اور تھانے محفوظ نہیں، پی ٹی آئی ملک کو عدم استحکام اور بے یقینی کی صورتحال میں رکھنا چاہتی ہے۔

صوبائی وزیر کا یہ بھی کہنا ہے کہ عمران خان نہیں چاہتے پاکستان کی معیشت چلے، ان کی خواہش ہے ملک میں سری لنکا جیسی صورتحال جنم لے۔