قیامِ پاکستان سے اب تک صدور، وزرائے اعظم کو ملے تحائف کی تفصیل، کابینہ ڈویژن سے رپورٹ طلب

26 دسمبر ، 2022

اسلام آباد ہائی کورٹ نے قیامِ پاکستان سے اب تک صدور اور وزرائے اعظم کو ملے تحائف کی تفصیل دینے کی درخواست پر کابینہ ڈویژن سے رپورٹ طلب کر لی۔

عدالتِ عالیہ کے جسٹس میاں گل حسن اورنگ زیب نے ابوذر سلمان نیازی کی درخواست پر احکامات جاری کر دیے۔

دورانِ سماعت درخواست گزار کے وکیل نے عدالت کو بتایا کہ پٹیشنر نے 1947ء سے اب تک کے صدور اور وزرائے اعظم کو ملے تحائف کی تفصیل مانگی ہے، تاہم کابینہ ڈویژن نے کلاسیفائیڈ کہہ کر معلومات کی فراہمی سے انکار کر دیا ہے، پاکستان انفارمیشن کمیشن نے 29 جون کو آرڈر دیا تھا مگر 5 ماہ گزرنے کے باوجود اس پر عمل درآمد نہیں ہوا۔

جسٹس میاں گل حسن اورنگزیب نے استفسار کیا کہ باقی پبلک سرونٹس کو بھی اس میں شامل کیوں نہیں کیا؟ آپ خود کو صدر اور وزیرِ اعظم کی حد تک محدود کیوں کر رہے ہیں؟ اس سے آپ کے عزائم کا پتہ چل رہا ہے، جو بھی پٹیشن آتی ہے وہ وزیرِ اعظم سے متعلق آتی ہے۔

ڈپٹی اٹارنی جنرل سید احسن رضا شاہ نے عدالت کو بتایا کہ میرے خیال سے 1990ء سے پہلے کا تو ریکارڈ ہی دستیاب نہیں ہو گا، حالانکہ ایسی معلومات تو ویب سائٹ پر ہونی چاہئیں۔