عمران خان کے وکیل نے وارنٹ منسوخی کی درخواست دائر کی، پھر واپس لے لی

15 مارچ ، 2023

ڈسٹرکٹ اینڈ سیشن کورٹ اسلام آباد میں توشہ خانہ کیس میں چیئرمین پی ٹی آئی عمران خان کی وارنٹ منسوخی کی درخواست پہلے دائر کی گئی گئی پھر واپس لے لی گئی۔

اسلام آباد کی ایڈیشنل سیشن جج ظفراقبال کی عدالت میں چیئرمین پی ٹی آئی کے وکیل فیصل چوہدری نےعمران خان کی طرف سے وارنٹِ منسوخی کی درخواست عدالت میں دائر کی۔

دورانِ سماعت عمران خان کے وکیل فیصل چوہدری نے عدالت کے روبرو کہا کہ کسی کے وارنٹ جاری کرتے ہوئے دیگر شہریوں کی زندگیاں تو خطرے میں نہیں ڈالی جا سکتیں، وارنٹ کا اختیار کیا ہے؟ کون جاری کر سکتا ہے؟ ہم وارنٹ معطل کرنے کی بات کر رہے ہیں، عمران خان لکھ کر دینے کو تیار ہیں کہ وہ عدالت میں پیش ہوں گے، عدالت نے دیکھنا ہے کہ عمران خان کے خلاف مقدمے کا کیس نہیں، شکایت کا کیس ہے۔

جج نے کہا کہ 3 سال سے کم سزا پر قابلِ ضمانت وارنٹ جاری ہوتے ہیں، توشہ خانہ کیس میں 3 سال کی سزا ہو سکتی ہے۔

وکیل فیصل چوہدری نے کہا کہ زمان پارک پر سیکیورٹی مامور ہے، عمران خان کہہ رہے ہیں کہ میں عدالت آنا چاہتا ہوں، انہیں عدالت میں پیش ہونے کا سیف ایگزٹ دیں، چیئرمین پی ٹی آئی کو 18 مارچ کو سیشن عدالت نے بلایا ہے، 4 دن پہلے گرفتار کر کے عمران خان کو کہاں رکھا جائے گا؟

جج نے عمران خان کے وکیل سے کہا کہ آپ فرضی باتیں کر رہے ہیں۔

وکیل فیصل چوہدری نے کہا کہ ہیلی کاپٹر عمران خان کی رہائش گاہ پر پہنچا ہوا ہے، اسلام آباد ہائی کورٹ میں وارنٹ منسوخ کرنے کی درخواست دائر ہوئی لیکن مقرر نہیں ہوئی، ایسا ماحول تو افتخار چوہدری یا مارشل لاء دور میں بھی نہیں ہوا۔