انتخابات ملتوی کرنے کیخلاف پی ٹی آئی کی درخواست پر 27 مارچ کی سماعت کا تحریری حکم نامہ جاری

سپریم کورٹ آف پاکستان نے انتخابات ملتوی کرنے کے خلاف پی ٹی آئی کی درخواست پر 27 مارچ کی سماعت کا تحریری حکم نامہ جاری کر دیا۔

3 صفحات پر مشتمل حکم نامہ چیف جسٹس پاکستان عمر عطاء بندیال نے تحریر کیا ہے۔

تحریری حکم نامے میں سپریم کورٹ کا کہنا ہے کہ آئین کے تحت عام انتخابات وقت پر ہونا لازم ہیں، بر وقت عام انتخابات کا ایمانداری کے ساتھ منصفانہ و قانون کے مطابق انعقاد جمہوریت کے لیے ضروری ہے۔

صورتِحال بہت تشویشناک، حکومت اور PTI فیصلہ کر لیں پاکستان کیلئے کیا بہتر ہے: چیف جسٹس

سپریم کورٹ نے انتخابات ملتوی کرنے پر الیکشن کمیشن، گورنرز کو بذریعہ چیف سیکریٹری اور پی ٹی آئی کی درخواست میں شامل تمام فریقین کو نوٹسز جاری کر دیے ۔

عدالتِ عظمیٰ نے اپنے تحریری حکم نامے میں کہا ہے کہ عام انتخابات کے انعقاد میں خامی، کمی یا ناکامی مفادِ عامہ اور ووٹنگ کا بنیادی حق متاثر کرتی ہے۔

سپریم کورٹ کا تحریری حکم نامے میں کہنا ہے کہ درخواست گزار کے مطابق الیکشن کمیشن نے صدرِ مملکت کی انتخابات کی تاریخ منسوخ کی۔

تحریری حکم نامے میں کہا گیا ہے کہ درخواست گزار کے مطابق الیکشن کمیشن صدر کی تاریخ منسوخ کرنے کا اختیار نہیں رکھتا۔

سپریم کورٹ نے اپنے تحریری حکم نامے میں کہا ہے کہ درخواست گزار کے مطابق الیکشن کمیشن نے انتخابات ملتوی کر کے آرٹیکل 254 کے پیچھے پناہ لی۔

تحریری حکم نامے میں عدالت نے کہا ہے کہ عدالتی نظائر میں آرٹیکل 254 کسی عمل کا مقررہ وقت گزرنے کے بعد اس کو غیر مؤثر ہونے سے تحفظ دیتا ہے۔

جسٹس سید منصور علی شاہ اور جسٹس جمال خان مندوخیل کے اختلافی نوٹ کا متن

جسٹس سید منصور علی شاہ (اپنی اور جسٹس جمال خان مندوخیل کی طرف سے)

عدالتِ عظمیٰ نے اپنے تحریری حکم نامے میں کہا ہے کہ آرٹیکل 254 مقررہ وقت پر ہونے والے عمل میں التواء کا تحفظ نہیں دیتا۔

سپریم کورٹ نے تحریری حکم نامے میں کہا ہے کہ درخواست گزار کے مطابق 8 اکتوبر تک انتخابات ملتوی کرنے کی کوئی آئینی پشت پناہی نہیں۔

تحریری حکم نامے میں عدالت نے کہا ہے کہ تمام فریقین کو نوٹسز جاری کیے جاتے ہیں، الیکشن کمیشن درخواست میں اٹھائے گئے قانونی سوالات پر جواب دے۔

عدالتِ عظمیٰ کا اپنے تحریری حکم نامے میں یہ بھی کہنا ہے کہ کیس کی مزید سماعت 28 مارچ دن ساڑھے 11 بجے ہو گی۔