پی ٹی آئی لیگل ٹیم نے پولیس کو عمران خان کے گھر کی تلاشی کی اجازت دے دی

لاہور پولیس نے زمان پارک میں واقع چیئرمین پی ٹی آئی عمران خان کے گھر کی تلاشی کے لیے سرچ وارنٹ حاصل کر لیے جبکہ پی ٹی آئی کی لیگل ٹیم نے پولیس کو عمران خان کے گھر کی تلاشی کی اجازت دے دی۔

لاہور پولیس کے مطابق تلاشی کے موقع پر ایس پی رینک کا افسر اور خواتین پولیس اہلکار بھی ہمراہ ہوں گی۔

لاہور پولیس کا کہنا ہے کہ عمران خان کے گھر کے اندورنی اور بیرونی حصوں میں سرچنگ کی جائے گی۔

زمان پارک سے گرفتار شر پسندوں کا PTI قیادت سے ہدایات لینے کا اعتراف

زمان پارک لاہور سے گزشتہ روز گرفتار کیے گئے 8 مبینہ شر پسندوں کے اہم انکشافات سامنے آ گئے۔

لاہور پولیس نے یہ بھی بتایا ہے کہ سرچ آپریشن کے دورانِ کمشنر لاہور ڈویژن بھی ہمراہ ہوں گے۔

اُدھر زمان پارک میں پولیس کے سرچ آپریشن کے معاملے پر عمران خان کی لیگل ٹیم بھی زمان پارک پہنچ گئی۔

عمران خان کی لیگل ٹیم نے سرچ وارنٹ دیکھ کر پولیس کو عمران خان کے گھر کی تلاشی کی اجازت دے دی۔

دوسری جانب 9 مئی کے واقعات میں مبینہ طور پر ملوث افراد کی گرفتاری کے معاملے پر پی ٹی آئی سے مذاکرات چیئرمین پی ٹی آئی کی زمان پارک میں واقع رہائش گاہ پر حکومتی ٹیم آج جائے گی جس کی سربراہی کمشنر لاہور ڈویژن کریں گے۔

ذرائع کے مطابق حکومتی ٹیم زمان پارک میں سرچ آپریشن پر پی ٹی آئی نمائندوں سے مذاکرات کرے گی، اتفاق ہونے پر 400 پولیس اہلکاروں کا تلاشی کا حصہ بننے کا امکان ہے۔

9مئی واقعات میں گرفتاری، حکومتی ٹیم مذاکرات کیلئے آج زمان پارک آئے گی

9 مئی کے واقعات میں مبینہ طور پر ملوث افراد کی گرفتاری کے معاملے پر حکومت اور پی ٹی آئی کے درمیان مذاکرات آج ہوں گے۔

لاہور پولیس کی جانب سے مال روڈ اور دھرم پورہ کے درمیان کینال روڈ تاحال بند ہے۔

زمان پارک کی طرف آنے والے تمام راستے آج بھی پولیس کی طرف سے بند ہیں جبکہ مال روڈ اور دھرم پورہ نہر پل پر پولیس کی نفری موجود ہے۔