فرمان الہی
نماز کے اوقات
معروف فلم ساز رانا کامران کی ہدایتکاری میں بننے والی فلم ’وی آئی پی‘ کا ٹریلر کراچی میں لانچ کر دیا گیا۔
واضح رہے کہ رانا کامران نامعلوم افراد، ماہ میر، لوڈ ویڈنگ اور قائد اعظم زندہ باد جیسی بلاک بسٹر فلموں میں غیر معمولی سنیماٹوگرافی کر چکے ہیں۔
بڑی عید پر ریلیز ہونے والی تفریحی فلم ’وی آئی پی‘ میں انتہائی باصلاحیت نئے اداکاروں زیک اور نمرہ شاہد کو مرکزی کرداروں میں متعارف کروایا گیا ہے۔
ٹریلر جاری کرنے کی تقریب میں بڑی تعداد میں فن کار شریک ہوئے، جن میں ہدایت کار اور اداکار جاوید شیخ، فلم ساز فضہ علی مرزا، ہدایت کار نبیل قریشی، ہدات کار ندیم بیگ اور دیگر شامل تھے۔
فلم بینوں کو اس فلم کی ریلیز کا بے صبری سے انتظار تھا۔ فلم کے ٹیزر دیکھ کر حاضرین بے حد محظوظ ہوئے اور فلم کی بے حد تعریف کی اور دوران اسکریننگ ہال تالیوں سے گونجتا رہا۔
دل چسپ کہانی، خوب صورت نظاروں اور منجھے ہوئے فن کاروں کی موجودگی کی بنیاد پر کہا جاسکتا ہے کہ وی آئی پی دیکھنے والوں کے لیے تفریح سے بھرپور فلم ثابت ہوگی۔
وی آئی پی ایک ایسی فلم ہے، جو فلم کے تمام ضروری عناصر کا احاطہ کرتی ہے۔ رانا کامران کی بے مثال ہدایت کاری کے ساتھ ساتھ اسکرین پر پیش کی جانے والی تازہ جوڑی ایک دلکش کہانی کا عندیہ دیتی ہے۔ متاثر کن بیک گراؤنڈ اسکور اور انتہائی خوب صورت انداز میں تیار کردہ مناظر ناظرین کو محبت، مزاح، زندگی اور سیاست کی دنیا کی سیر کراتے ہیں۔
ایک انتہائی سیاسی معاشرے کے پس منظر پر مبنی یہ ہلکی پھلکی سیاسی کامیڈی عام لوگوں کی زندگیوں کا احاطہ کرتی ہے اور ہر منظر میں مزاح اور ایک تعلق پیدا کرتی ہے۔
ایس سیما کی پروڈیوس کردہ فلم ’’وی آئی پی‘‘ کی دیگر کاسٹ میں سلیم معراج، احتشام الدین، سیف حسن، اختر حسنین، گل رعنا، عرفان موتی والا، اکبر اسلام، دانش نواز اور دیگر شامل ہیں۔
فلم کی کہانی رانا کامران اور ثاقب ظفر کی مشترکہ تحریر کردہ اسکرین پلے اور ثاقب ظفر کی مشترکہ ہدایت کاری، جب کہ ایسوسی ایٹ ڈائریکٹر عمران ہارون اور ساؤنڈ ڈیزائن کامران اسماعیل کی ہے۔
فلم کا ساؤنڈ ٹریک اور بیک گراؤنڈ اسکور موسیقار شانی ارشد نے ترتیب دیا ہے، جب کہ گانے رضوان حسن کی تخلیق ہیں۔ وی آئی پی عید الاضحیٰ کے موقع پر ملک بھر میں ریلیز کی جائے گی۔
یہ فلم تفریح، مزاح اور معاصر معاشرے کی پیچیدگیوں پر ایک منفرد نقطہ نظر کے بہترین امتزاج سے فلم بینوں کے معیار پر یقیناً پورا اترے گی۔
