پانامہ پیپرز ،436 افراد کیخلاف تحقیقات، سراج الحق کی درخواست سماعت کیلئے مقرر

02 جون ، 2023

سپریم کورٹ آف پاکستان نے پانامہ پیپرز میں 436 پاکستانیوں کے خلاف تحقیقات کے لیے امیرِ جماعتِ اسلامی پاکستان سراج الحق کی درخواست سماعت کے لیے مقرر کر دی۔

عدالتِ عظمیٰ کے جسٹس سردار طارق مسعود اور جسٹس امین الدین خان پر مشتمل بینچ 9 جون کو سماعت کرے گا۔

سپریم کورٹ نے امیرِ جماعتِ اسلامی پاکستان سراج الحق کی درخواست پر اٹارنی جنرل سمیت دیگر فریقین کو نوٹسز جاری کر دیے۔

سراج الحق نے 2016ء میں پانامہ پیپرز میں شامل 436 پاکستانیوں کے خلاف تحقیقات کی درخواست دی تھی۔

سراج الحق کا مؤقف

امیرِ جماعت اسلامی پاکستان سراج الحق کا اس ضمن میں کہنا ہے کہ سپریم کورٹ میں 436 پانامہ زدہ افراد کی پٹیشن موجود ہے، ان کے خلاف بھی کارروائی ہونی چاہیے۔

ان کا کہنا ہے کہ پانامہ پیپرز کیس میں صرف نواز شریف کو سزا دی گئی، باقی کسی شخص پر ہاتھ نہیں ڈالا گیا۔

سراج الحق کا یہ بھی کہنا ہے کہ جن لوگوں کا پیسہ باہر ہے وہ واپس لایا جائے، ان پیسوں سے ڈیم بنایا جائے۔

قومی خبریں سے مزید