فرمان الہی
نماز کے اوقات
آرمی چیف جنرل سید عاصم منیر کا کہنا ہے کہ اقلیتوں کے خلاف عدم برداشت اور انتہائی رویے کے واقعات کی کوئی گنجائش نہیں۔
آرمی چیف نے آئی ایس پی آر انٹرن شپ پروگرام کے شرکا سے خطاب کرتے ہوئے کہا کہ جڑانوالہ کا واقعہ انتہائی افسوسناک اور ناقابل برداشت ہے، ایسے جرائم کے مرتکب افراد کو انصاف کے کٹہرے میں لایا جائے گا۔
ان کا کہنا تھا کہ پاکستان کے تمام شہری بلا تفریق مذہب، جنس، ذات یا عقیدہ ایک دوسرے کیلئے برابر ہیں۔
سپہ سالار نے کہا کہ عدم برداشت، بد اعتمادی، پرتشدد رویوں اور اسے ہوا دینے کی دشمن قوتوں کی کوششیں جاری ہیں۔
ان کا کہنا تھا کہ معاشرے کے کسی بھی طبقے کی طرف سے کسی کے خلاف عدم برداشت کی گنجائش نہیں۔
آرمی چیف نے ملک میں انارکی، بدامنی پھیلانے اور عوام میں دراڑ ڈالنے والوں کا ذکر کرتے ہوئے کہا کہ کسی کو قانون ہاتھ میں لینے کی اجازت نہیں دی جائے گی۔
جنرل عاصم منیر نے کہا کہ نوجوان سچ اور آدھا سچ، جھوٹ اور غلط معلومات کا فرق سمجھیں۔
انہوں نے کہا کہ قومی ترقی میں نوجوانوں کا کردار بہت اہم ہے، نوجوان پاکستان کا مستقبل ہیں، نوجوان ملک میں امن، ترقی اور خوشحالی میں اہم کردار ادا کرسکتے ہیں۔
آرمی چیف نے انٹرن شپ پروگرام کامیابی سے مکمل کرنے پر نوجوان انٹرنز کو سراہا، پروگرام میں پاکستان بھر سے 370 طلبا و طالبات شریک ہوئے۔
