فرمان الہی
نماز کے اوقات
شیخوپورہ میں قلعہ ستار شاہ اسٹیشن کے قریب مسافر ٹرین ٹریک پر کھڑی مال گاڑی سے ٹکرا گئی۔
ریسکیو حکام کے مطابق حادثے میں میانوالی سے لاہور جانے والی ٹرین میں سوار 31 مسافر زخمی ہو گئے۔
زخمی ہونے والوں میں سے 5 مسافروں کو ڈسٹرکٹ ہیڈکوارٹر اسپتال منتقل کر دیا گیا ہے۔
ریلوے حکام نے ٹرین ڈرائیور عمران سرور اور اسسٹنٹ ڈرائیور محمد بلال کو معطل کر دیا۔
واضح رہے کہ ایک روز قبل قلعہ ستار شاہ کے پاس مال گاڑی کی 4 بوگیاں ڈی ٹریک ہو گئی تھیں۔
میانوالی سے آنے والی مسافر ٹرین بھی کانٹا تبدیل نہ ہونے پر اسی ٹریک پر آ گئی۔
مسافر ٹرین کے ڈرائیور کی کوشش کے باوجود ٹرین مال بردار بوگی سے ٹکرا گئی۔
ریلوے ذرائع کے مطابق جائے حادثہ پر ریسکیو کا کام جاری ہے۔
ترجمان ریلوے کا کہنا ہے کہ لاہور ڈویژن میں ٹرین آپریشن جاری ہے، شیخوپورہ کے پاس حادثے کے بعد ٹریک صبح ساڑھے 7 بجے کلیئر کر دیا گیا تھا۔
انہوں نے کہا کہ میانوالی ایکسپریس کو بھی روانہ کردیا گیا تھا، ٹرین میں سوار تمام مسافر محفوظ ہیں،حادثے کی جگہ سے متاثرہ بوگیوں کو ہٹانے کا کام جاری ہے۔
ترجمان کا کہنا ہے کہ مال گاڑی کی متاثرہ بوگیوں کو ریلوےیارڈ لاہور روانہ کیا جائے گا، 3 ریلوے ملازمین معمولی زخمی ہوئے ہیں، ٹرین ڈرائیور عمران سرور اور اسسٹنٹ ڈرائیور محمد بلال کو معطل کر دیا گیا ہے۔
