جاپان کے شاہی خاندان کی انسٹاگرام پر غیر متوقع انٹری

دنیا کی قدیم ترین جاپانی بادشاہت نے شہنشاہ ناروہیٹو اور مہارانی ماساکو کی 20 باضابطہ طور پر بنائی گئیں تصاویر اور ویڈیوز پوسٹ کر کے سوشل میڈیا پر قدم رکھا۔

جاپانی شاہی خاندان کے اس غیر متوقع انسٹاگرام پر ڈیبیو کا مقصد ان کی مصروفیات کو عوام میں اجاگر کرنے کے ساتھ ساتھ حالیہ سال کے تہواروں اور مواقعوں کے ذریعے عوام اور شاہی خاندان میں ایک رشتہ پیدا کرنا ہے۔

شاہی خاندان کے انسٹاگرام اکاؤنٹ نے ایک دن کے اندر اندر 200 ہزار سے زائد سوشل میڈیا صارفین کی توجہ بھی حاصل کر لی ہے۔

جاپانی شاہی خاندان کے اس اکاؤنٹ کو پہلے 7 دنوں تک نجی رکھا گیا تھا جبکہ بعد میں اسے پبلک کر دیا گیا ہے۔

امپیریل ہاؤس ہولڈ ایجنسی کے ترجمان کے مطابق شاہی خاندان چاہتا تھا کہ عوام کو ان کے سرکاری فرائض کی بہتر انداز میں معلومات ہو۔

شاہی خاندان سوشل میڈیا کے ذریعے نوجوانوں سے رابطہ کر کے اُن کی جاپانی حکومت میں دلچسپی بحال کرنا چاہتا ہے۔

یاد رہے کہ جاپانی بادشاہت کی افسانوی ابتداء دو ہزار سال سے زیادہ پر محیط ہے جبکہ شہنشاہ پر کسی بھی قسم کی عوامی تنقید جاپان میں ممنوع ہے۔

شاہی خاندان کے پہلے آفیشل اکاؤنٹ نے کسی بھی دوسرے انسٹاگرام اکاؤنٹ کو تاحال فالو نہیں کیا ہے۔