جیل انتظامیہ کی بانیٔ PTI سے سہولتیں واپس لینے کی خبروں کی تردید

راولپنڈی میں واقع اڈیالہ جیل کی انتظامیہ نے بانیٔ پی ٹی آئی سے جیل میں سہولتیں واپس لینے کی خبروں کی تردید کر دی۔

اڈیالہ جیل کے سپرنٹنڈنٹ کے مطابق بانیٔ پی ٹی آئی کو جیل مینول کے مطابق تمام سہولتیں دستیاب ہیں اور بانیٔ پی ٹی آئی کی سیکیورٹی اور صحت کا خاص خیال رکھا جاتا ہے۔

ان کا کہنا ہے کہ بانیٔ پی ٹی آئی کو ایک انگریزی روزنامہ روزانہ دیا جاتا ہے، انہیں ورزش کے لیے مشین اور واک کے لیے جگہ بھی دستیاب ہے۔

جیل کے سپرنٹنڈنٹ کے مطابق بانیٔ پی ٹی آئی اور بشریٰ بی بی کو کھانے کے لیے علیحدہ کچن دیا گیا ہے، ان کی سیکیورٹی کے لیے عملہ ہر وقت موجود رہتا ہے، انہیں پڑھنے کے لیے کتابیں بھی دستیاب ہیں۔

بشریٰ بی بی کی جیل میں بدسلوکی کی درخواست سپرنٹنڈنٹ کو بھجوا دی گئی

اسلام آباد ہائی کورٹ نے بشریٰ بی بی کی جیل میں بدسلوکی کے خلاف درخواست سپرنٹنڈنٹ اڈیالہ جیل کو بھجوا دی۔

اڈیالہ جیل کے سپرنٹنڈنٹ نے کہا ہے کہ بانیٔ پی ٹی آئی کے سیل میں گٹر کھلا ہونے کی خبروں میں صداقت نہیں، بشریٰ بی بی کے سیل میں چوہوں کی موجودگی کی خبروں میں بھی صداقت نہیں۔

جیل کے سپرنٹنڈنٹ کے مطابق بانیٔ پی ٹی آئی کو ہفتے میں 2 دفعہ فیملی، وکلاء اور سیاسی ملاقاتوں کی اجازت ہے، جیل میں سماعت کے موقع پر بھی وہ ملاقاتیں کرتے ہیں، انہیں ٹیلی ویژن کی سہولت بھی دستیاب ہے۔