یوکرین نے جرمن ہتھیار روس کیخلاف استعمال کیے تو مشکلات ہوں گی، چانسلر شولز

15 ستمبر ، 2024

جرمن چانسلر اولاف شولز نے واضح کیا ہے کہ وہ اس بات کی مخالفت جاری رکھیں گے کہ روس کیخلاف یوکرین کو طویل فاصلے تک مار کرنے والے میزائل حملوں کی اجازت دی جائے۔

جرمن میڈیا کے مطابق چانسلر شولز کا کہنا ہے کہ وہ ان ہتھیاروں کی بات کررہے ہیں،جو جرمنی نے یوکرین کو فراہم کیے ہیں۔

چانسلر نے کہا کہ دیگر ممالک یوکرین کو اجازت دیں تو اس صورت میں بھی وہ اپنے موقف پر قائم رہیں گے کیونکہ یہ مشکلات کا باعث بنے گا۔

ان کا کہنا تھا کہ امریکا سمیت مغربی ممالک میں اس بات پر بحث جاری ہے کہ آیا یوکرین کو روس کیخلاف طویل فاصلے تک مار کرنے والے میزائل استعمال کرنے کی اجازت دی جائے یا نہیں۔

یاد رہے کہ امریکا کے صدر جوبائیڈن اور برطانیہ کے وزیراعظم کیئر اسٹارمر کی وائٹ ہاؤس میں ہوئی ملاقات میں بھی اس معاملے پر غور کا امکان تھا تاہم بعد میں اس بارے میں وضاحت نہیں کی گئی۔

روس کے صدر پیوٹن نے خبردار کیا تھا کہ اگر نیٹو نے ایسا کیا تو اس کا مطلب جنگ میں براہ راست شرکت کرنا تصور ہوگا اور پھر نیٹو نتائج بھگتنے کے لیے بھی تیار رہے۔

بین الاقوامی خبریں سے مزید