فرمان الہی
نماز کے اوقات
یونیسف کی جانب سے پاکستان کی پہلی خاتون سفیر برائے اطفال صبا قمر جرمن قونصل خانے پہنچیں، جہاں انہوں نے قونصل جنرل ڈاکٹر روڈیگر سے ملاقات کی۔
ملاقات میں بچوں کے حقوق، ماحولیاتی آلودگی پر قابو پانے سمیت دیگر امور پر تبادلہ خیال کیا گیا۔
اس موقع پر صبا قمر کا کہنا تھا کہ نوجوانوں کے ساتھ مل کر تمام مسائل حل کیے جا سکتے ہیں۔
قونصل جنرل نے کہا کہ جرمنی بچوں کے حقوق کیلئے ثابت قدم ہے، پاکستان میں بھی بچوں کے حقوق کیلئے کیے جانے والے کام قابل ستائش ہیں۔
جرمن قونصل جنرل نے مزید کہا کہ گلوبل وارننگ ایک عالمی مسئلہ ہے، جس کی روک تھام کیلئے سب کو کردار ادا کرنا ہوگا۔
انہوں نے کہا کہ جرمن یونیسیف کو فنڈز کی فراہمی کرنے والا سب سے بڑا ملک ہے، گذشتہ 3 سال کے دوران یونیسیف کو سب سے زیادہ فنڈز فراہم کیے گئے ہیں۔
جرمن قونصل جنرل کی جانب سے کراچی میں شجرکاری مہم کو موثر بنانے کیلئے صبا قمر کو بیج بھی فراہم کیے گئے۔
جرمن قونصل جنرل کا کہنا تھا کہ کراچی میں ماحولیاتی آلودگی پر قابو پانے اور درخت لگانے کی مہم کے حوالے سے بھی معاونت فراہم کی گئی ہے، انہوں نے جرمن قونصل خانے کی جانب سے شجر کاری اور آگاہی مہم میں حصہ لینے کی دعوت بھی دی۔
جرمن قونصل جنرل نے کہا کہ کراچی کے شہریوں کو شجرکاری مہم میں حصہ لینے کی دعوت دیتے ہیں۔
