فرمان الہی
نماز کے اوقات
پاک آئی ڈی ویب سائٹ بند کر کے نادرا موبائل ایپلیکیشن لانچ کرنے اور 3 نئے ریجنل دفاتر کے قیام کا فیصلہ کر لیا گیا ہے۔
اس حوالے سے وفاقی وزیرِ داخلہ محسن نقوی نے کہا ہے کہ کل 17 جنوری سے پاک آئی ڈی ویب سائٹ بند کی جا رہی ہے، نادرا کی پاک آئی ڈی ویب سائٹ بند کر کے تمام خدمات موبائل ایپ پر فراہم کی جائیں گی، ویب سائٹ کے استعمال میں شہریوں بالخصوص بیرونِ ملک مقیم پاکستانیوں کو مشکلات پیش آتی تھیں۔
محسن نقوی کا کہنا ہے کہ 3 نئے ریجنل سینٹر آزاد جموں و کشمیر، گوادر اور گلگت بلتستان میں بنائے جائیں گے۔
انہوں نے کہا کہ جعل ساز عناصر جعلی ویب سائٹس کے ذریعے شناختی دستاویزات بنوانے میں معاونت کا کاروبار کر رہے تھے، شہریوں کی ذاتی معلومات حاصل کر کے ان کا غلط استعمال کرنے کی کوشش کی جاتی تھی، وزارتِ داخلہ اور وزارتِ خارجہ نے جعل ساز عناصر کا سختی سے نوٹس لیا ہے۔
محسن نقوی نے کہا ہے کہ نادرا دیگر اداروں کے ساتھ مل کر ان عناصر کے خلاف کارروائی کو یقینی بنا رہا ہے، نادرا کی موبائل ایپ کو پہلے سے بہت مزید بہتر بنا دیا گیا ہے۔
محسن نقوی نے کہا کہ شناختی کارڈ، نائکوپ، پی او سی، ب فارم، ایف آر سی سمیت تمام خدمات موبائل ایپ پر دستیاب ہیں، شہری گھر بیٹھے موبائل ایپ پر شناختی دستاویزات کی تمام تر کارروائی مکمل کر سکتے ہیں، نئے ریجنل دفاتر 31 مارچ سے کام شروع کر دیں گے۔
محسن نقوی نے یہ بھی کہا کہ مارچ تک ملک کی تمام تحصیلوں میں نادرا دفاتر قائم کرنے کا ہدف پورا کر لیا جائے گا۔
