فرمان الہی
نماز کے اوقات
پاکستان شوبز انڈسٹری کی سینئر اداکارہ ثانیہ سعید کا کہنا ہے کہ نئے اداکار باصلاحیت ہیں لیکن انہیں اچھے اسکرپٹس نہیں مل رہے۔
ثانیہ سعید نے حال ہی میں ایک ویب شو میں بطور مہمان شرکت کی جہاں اُنہوں نے انڈسٹری میں نئے آنے والے اداکاروں کے بارے میں بات کی۔
اُنہوں نے بالخصوص ہانیہ عامر کے ساتھ کام کرنے کے تجربے کے بارے میں بات کرتے ہوئے کہا کہ ہانیہ کے کام میں بہت زیادہ بہتری آئی ہے اس کی وجہ یہ ہے کہ وہ اپنے کام پر بہت زیادہ توجہ دیتی ہیں۔
اداکارہ نے کہا کہ نئے آنے والے اداکاروں کے ساتھ ایک مسئلہ یہ ہے کہ اُنہیں مشکل کرداروں کی پیشکش نہیں کی جاتی بلکہ صرف ان کی شخصیت کا استحصال کیا جا رہا ہے۔
اُنہوں نے کہا کہ آج کل اداکاروں کو ان کی شخصیت دیکھ کر اسکرپٹس دی جا رہی ہیں کہ یہ اس طرح کا انسان ہے تو یہ اس کردار کو آرام سے ادا کر سکتا ہے جبکہ ایسا نہیں ہونا چاہیے اس طرح اداکار کو اپنی اداکارانہ صلاحیتیں سامنے لانے کا موقع نہیں ملتا۔
ثانیہ سعید نے کہا کہ میں معذرت کے ساتھ یہ بات بھی کہنا چاہوں گی کہ ہمارے پاس جو نئے اداکار آ رہے ہیں وہ باصلاحیت ہیں لیکن اُنہیں اچھے اسکرپٹس نہیں مل رہے کیونکہ ہمارے پاس اسکرپٹس لکھنے والے لوگ اچھے نہیں ہیں۔
