فرمان الہی
نماز کے اوقات
دنیا کے امیر ترین شخص ایلون مسک نے دعویٰ کیا ہے کہ ان کی سوشل میڈیا ایپ ’ایکس (سابقہ ٹوئٹر)‘ پر گزشتہ روز بڑا سائبر حملہ ہوا جس کی وجہ سے دنیا بھر میں صارفین کی سوشل میڈیا ایپ تک رسائی متاثر ہوئی۔
ڈاؤن ڈیٹیکٹر ٹریکنگ سائٹ کے مطابق گزشتہ روز ایشیاء، یورپ اور شمالی امریکا میں ایکس کی سروس متاثر ہونے کی رپورٹس موصول ہونا شروع ہوئیں۔
اس حوالے سے ایلون مسک نے سوشل میڈیا ویب سائٹ ایکس پر اپنی ایک پوسٹ میں دعویٰ کیا ہے کہ ’ایکس‘ پر روزانہ ہی سائبر حملے ہوتے رہتے ہیں لیکن اب بہت زیادہ وسائل کا استعمال کرتے ہوئے بڑا سائبر حملہ کیا گیا ہے جس میں یا تو کوئی بڑا گروپ یا پھر کوئی ملک شامل ہے۔
ایلون مسک نے اس حوالے سے امریکی میڈیا سے گفتگو کرتے ہوئے یہ بھی کہا کہ یہ سائبر حملہ یوکرین کے آئی پی ایڈریس سے ہوا ہے تاہم ان کی اس بات سے سائبر سیکیورٹی کے ماہرین نے سوشل میڈیا پر اختلافِ رائے کا اظہار کیا ہے۔
سائبر سیکیورٹی کے ماہرین کا کہنا ہے کہ ابھی یہ کہنا قبل از وقت ہے کہ دنیا بھر میں ایکس کی سروس کسی بڑے سائبر حملے کی وجہ سے متاثر ہوئی ہے۔
