• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

معروف ڈرامہ نگار سائرہ رضا انتقال کر گئیں

----فائل فوٹو
----فائل فوٹو

پاکستان کی مشہور ڈرامہ نگار سائرہ رضا گزشتہ شب دل کا دورہ پڑنے کے باعث انتقال کر گئیں، ان کی وفات کی خبر نے پاکستانی ادبی اور تفریحی حلقوں کو غم میں مبتلا کر دیا ہے۔

سائرہ رضا نے پاکستانی ڈرامہ انڈسٹری کو لازوال کہانیاں دیں، ان کے تحریر کردہ ڈراموں میں ’دلِ موم کا دیا‘، ’محبت داغ کی صورت‘، ’میرے ہمسفر‘ اور حالیہ ڈرامہ ’یحییٰ‘ نے ناظرین کے دلوں میں گہرا اثر چھوڑا۔

وہ جذباتی گہرائی، معاشرتی حقیقت نگاری اور کرداروں کی نفسیاتی پیچیدگی کو بڑے خوبصورت انداز میں پیش کرنے کی ماہر تھیں۔

ان کے تحریر کردہ ڈرامے دلِ موم کا دیا اور میرے ہمسفر بین الاقوامی سطح پر بھی بے حد مقبول ہوئے اور انہوں نے اس کے ذریعے بےشمار داد حاصل کی۔

ان کے حالیہ ڈرامے یحییٰ میں خوشحال خان اور مدیحہ امام نے مرکزی کردار نبھائے، جسے جیو ٹی وی پر نشر کیا گیا اور ناظرین کی جانب سے بھرپور پذیرائی ملی۔

سائرہ رضا کو گزشتہ شب اچانک شدید دل کا دورہ پڑا، جس پر انہیں فوری طور پر اسپتال منتقل کیا گیا، تاہم وہ جانبر نہ ہو سکیں اور خالقِ حقیقی سے جا ملیں۔

ان کے انتقال پر ساتھی فنکاروں، مصنفین، مداحوں اور اہلِ قلم کی جانب سے گہرے رنج و غم کا اظہار کیا جا رہا ہے۔

ایک قریبی ساتھی نے سوشل میڈیا پر لکھا کہ دل ٹوٹ گیا ہے، معلوم نہ تھا کہ وہ ہماری آخری ملاقات تھی۔ ایک اور ساتھی نے پیغام میں لکھا کہ ابھی تک یقین نہیں آ رہا کہ وہ ہم میں نہیں رہیں۔

سائرہ رضا کی وفات ادبی اور پاکستانی ڈرامہ انڈسٹری کا ایک ناقابلِ تلافی نقصان قرار دیا جارہا ہے۔

انٹرٹینمنٹ سے مزید