فرمان الہی
نماز کے اوقات
امریکا کی جانب سے ایک بار پھر روس یوکرین جنگ کے دوران بھارت پر روس کو مالی امداد فراہم کرنے کا الزام عائد کیا گیا ہے۔
وائٹ ہاؤس کے ڈپٹی چیف آف اسٹاف اور صدر ٹرمپ کے اہم سیاسی مشیر اسٹیفن ملر نے ایک امریکی نشریاتی ادارے کو انٹرویو دیا۔
انہوں نے ایک سوال کے جواب میں بھارت پر الزام عائد کرتے ہوئے کہا کہ بھارت روس سے تیل خرید کر یوکرین کے خلاف جاری جنگ میں اسے مالی امداد فراہم کر رہا ہے۔
’فوکس نیوز‘ کے پروگرام میں گفتگو کرتے ہوئے اسٹیفن ملر نے مزید کہا کہ لوگ یہ حقیقت جان کر حیران رہ جائیں گے کہ روسی تیل کی خریداری میں بھارت عملی طور پر چین کے برابر ہے۔
امریکی صدر کے سیاسی مشیر نے یہ بھی کہا کہ ٹرمپ کے بھارتی وزیراعظم نریندر مودی سے بہت اچھے تعلقات ہیں لیکن بھارت کا اس طرح روس سے تیل خرید کر اسے جنگ میں مالی امداد فراہم کرنا امریکا کو ہرگز قبول نہیں۔
دوسری جانب اس بیان پر بھارتی سفارت خانے کی جانب سے تاحال کوئی تبصرہ یا ردِ عمل سامنے نہیں آیا۔
یاد رہے کہ کچھ روز قبل بھارتی سرکاری ذرائع نے غیر ملکی خبر رساں ایجنسی کو بتایا تھا کہ نئی دہلی روس سے تیل کی خریداری جاری رکھے گا چاہے امریکا کی جانب سے دھمکیاں ہی کیوں نہ دی جائیں۔
