فرمان الہی
نماز کے اوقات
بھارت کے علاقے تلنگانہ میں انسانیت سوز واقعہ پیش آیا جہاں ایک خاتون نے یوٹیوب ویڈیو سے سیکھے گئے طریقے پر عمل کرتے ہوئے اپنے شوہر کو قتل کر دیا، پولیس نے قتل میں ملوث بیوی، اس کے عاشق اور اس کے دوست کو گرفتار کر لیا۔
پولیس کے مطابق مقتول مقامی لائبریری میں صفائی کا کام کرتا تھا اور اکثر شراب نوشی کے بعد اپنی بیوی رامادیوی سے جھگڑا کرتا تھا، رامادیوی گھریلو اخراجات کے لیے اسنیکس فروخت کرتی تھی، اسی دوران اس کی ملاقات 50 سالہ کرے راجیا سے ہوئی، یہ ملاقات جلد ہی رومانوی تعلقات میں بدل گئی۔
تفتیشی افسران کا کہنا ہے کہ رامادیوی شوہر کو راستے سے ہٹانا چاہتی تھی، جس کے لیے اس نے یوٹیوب پر ایسے طریقے تلاش کیے اور ایک ویڈیو دیکھی جس میں بتایا گیا کہ کان میں زہریلا کیمیکل یا کیڑے مار دوا ڈالنے سے انسان کی موت واقع ہو سکتی ہے۔
قتل کی رات راجیا اور اس کا ساتھی مقتول سمپت کو بہانے سے باہر لے گئے جہاں تینوں نے شراب نوشی کی، جب سمپت نشے میں بے ہوش ہو گیا تو راجیا نے اس کے کان میں زہریلا کیمیکل ڈال دیا، جس سے وہ موقع پر ہی ہلاک ہوگیا۔
قتل کے بعد راجیا نے رامادیوی کو اطلاع دی کہ منصوبہ کامیاب ہو گیا ہے، اگلے دن رامادیوی نے پولیس میں شوہر کی گمشدگی کی رپورٹ درج کروائی تاکہ شک نہ ہو، تاہم جب مقتول کی لاش یکم اگست کو ملی تو رامادیوی اور راجیا دونوں نے پولیس سے درخواست کی کہ لاش کا پوسٹ مارٹم نہ کیا جائے، جس سے شک مزید گہرا ہو گیا۔
سمپت کے بیٹے نے والد کی موت پر شکوک و شبہات کا اظہار کیا۔ پولیس نے کال ریکارڈز، موبائل لوکیشنز اور سی سی ٹی وی فوٹیج کی مدد سے معاملے کی تہہ تک پہنچنے میں کامیابی حاصل کی۔
تفتیش کے دوران رامادیوی، راجیا اور اس کے ساتھی نے اپنے جرم کا اعتراف کر لیا، تینوں ملزمان کو گرفتار کر کے عدالتی تحویل میں دے دیا گیا ہے۔
